မောင်တောတွင် ဘင်္ဂါလီရွာသားများကို စစ်သင်တန်းပို့ချနေသည့်သတင်းရရှိဟု အစိုးရထုတ်ပြန်
DVB
·
December 30, 2016
ရခိုင်ပြည်နယ် မောင်တောမြို့နယ်၊ ဦးရှည်ကျကျေးရွာအုပ်စု၊ အလယ်ရွာအနီး တောင်ကြားထဲမှာ လက်နက်ကိုင်ဆောင်ထားတဲ့ မသင်္ကာသူ ၁၀ ဦးက ကျေးရွာသားတွေကို စစ်သင်တန်းပို့ချနေတဲ့သတင်း ရရှိတဲ့အကြောင်း အစိုးရက သတင်းထုတ်ပြန်ပါတယ်။
လုံခြုံရေးတပ်ဖွဲ့ဝင်တွေက သတင်းအရ သွားရောက်ရှင်းလင်းရာမှာ ဒီဇင်ဘာ ၂၉ ရက် မနက်ပိုင်းက မသင်္ကာသူ ၃ ဦးအား ဖမ်းဆီးရမိခဲ့ပြီး ဖမ်းဆီးရမိသူတွေကို တရားဥပဒေနဲ့ အရေးယူ ဆောင်ရွက်နေတယ်လို့ နိုင်ငံတော် အတိုင်ပင်ခံရုံး သတင်းထုတ်ပြန်ရေးကော်မတီ ထုတ်ပြန်ချက်မှာ ဖော်ပြပါတယ်။
ဒါပေမယ့် စစ်သင်တန်းတွေပေးနေတဲ့ အထောက်အထား တစုံတရာ တွေ့မတွေ့ ဆိုတာကိုတော့ သတင်းထုတ်ပြန်ချက်မှာ ဖော်ပြခြင်းမရှိပါဘူး။
အောက်တိုဘာ ၉ ရက် မောင်တော ရဲကင်းစခန်းတွေကို မတိုက်ခိုက်ခင် အကြမ်းဖက်စီးနင်းသူတွေက ၂ နှစ်လောက်ကြိုပြီး ရခိုင်ပြည်နယ်မြောက်ပိုင်းက ကျေးရွာတွေမှာ လက်နက်ကိုင်သင်တန်း၊ ပြောက်ကျားသင်တန်းနဲ့ ဖောက်ခွဲရေးသင်တန်းတွေ လျှို့ဝှက်ပေးခဲ့တယ်လို့ ဘယ်လ်ဂျီယံအခြေစိုက် နိုင်ငံတကာပဋိပက္ခလေ့လာစောင့်ကြည့်ရေးအဖွဲ့ (အိုင်စီဂျီ) က ပြောထားပါတယ်။
ဒီဇင်ဘာ ၂၉ ရက် ညနေပိုင်းကတော့ မောင်တောမြို့နယ် ကျီးကန်းပြင် အနောက်ကျေးရွာမှာ အကြမ်းတိုက်ခိုက်မှု ဖြစ်စဉ်မှာ ပါဝင်သူ ၂ ဦးကို လုံခြုံရေးတပ်ဖွဲ့ဝင်တွေက ဖမ်းဆီးရမိခဲ့တယ်လို့လည်း အစိုးရက သတင်းထုတ်ပြန်ထားပါတယ်။
တချိန်တည်းလိုလိုမှာပဲ မောင်တောမြို့နယ် ဂွဆုံကျေးရွာနေ ရာအိမ်မှူး အန်နာမူလာဟာ အလုပ်ကိစ္စနဲ့ ဂွဆုံအလယ်ကျေးရွာကို သွားရောက်စဉ် လမ်းမှာ တုတ်၊ ဓား လက်နက်ကိုင်ဆောင်ထားသူ ၆ ဦးက ဝိုင်းဝန်းရိုက်နှက်ပြီး ရွာအရှေ့ဘက်ရှိ မေယုတောင်ကြောပေါ်သို့ ကြိုးတုတ်ခေါ်ဆောင်သွားတယ်လို့လည်း ဆိုပါတယ်။