ရန်ကုန်တိုင်းအစိုးရအဖွဲ့ရုံး ဗုံးပေါက်ကွဲမှု သံသယရှိသူ ၂ ဦးကို ဖမ်းဆီးစစ်ဆေးနေ
DVB
·
November 26, 2016
ရန်ကုန်တိုင်းဒေသကြီးအစိုးရအဖွဲ့ရုံးအတွင်း မနေ့ညနေပိုင်းက အသေးစားပေါက်ကွဲမှု ၂ ကြိမ်ဖြစ်ပြီး နောက်ပိုင်း သံသယရှိသူ တရားခံ ၂ ဦးကို ရန်ကုန်တိုင်းရဲတပ်ဖွဲ့က ဖမ်းဆီးစစ်ဆေးနေတယ်လို့ ရဲတပ်ဖွဲ့ဆီက သတင်းရရှိပါတယ်။
မနေ့က ပေါက်ကွဲဖြစ်ချိန်မှာဘဲ ရန်ကုန်တိုင်းအစိုးရအဖွဲ့ရုံး ထွက်ပေါက်တံခါးတွေကို တန်းပိတ် လိုက်ပြီး ရှာဖွေရာမှာ ဒီရုံးထဲမှာပဲ သံသယရှိသူ အမျိုးသမီး ၂ ဦးကို ဖမ်းဆီးစစ်ဆေးနေတာပါ။
အသေးစိတ်အချက်အလက်ကိုတော့ ရဲတပ်ဖွဲ့က ပြောဆိုခြင်း မရှိသေးပါဘူး။ ဒီနေ့ မနက်ပိုင်း သတင်းတွေအရတော့ ထွက်ပြေးနေတဲ့ အမျိုးသား ၂ ဦးကို သင်္ကန်းကျွှန်းမြို့နယ်ဘက်မှာ ဖမ်းမိထားတယ်လို့ သိရပေမယ့် သီးခြားအတည်ပြုချက် မရရှိသေးပါဘူး။
ရန်ကုန်မှာ အသေးစားပေါက်ကွဲမှုဖြစ်စဉ်ကတော့ အခုလအတွင်း မနေ့ကအထိ ၄ ကြိမ်ရှိနေပြီး ဒီထဲမှာ အစိုးရရုံး ၂ ရုံး ပါဝင်ပါတယ်။
တိုင်း လ၀က ရုံးလှေကားရင်းရှိ အမှိုက်ပုံးထဲကနေ M-150 ပုလင်း အသုံးပြု လက်လုပ်ဗုံး အမျိုးအစား တလုံးပေါက်ကွဲခဲ့တာဖြစ်ပြီး နောက်တလုံးကိုတော့ လုံခြုံရေးတပ်ဖွဲ့က ဖောက်ခွဲပစ်ခဲ့ တာ ဖြစ်ပါတယ်။
ဒဂုံမြို့နယ်ကျောက်စိမ်းခန်းမ ရဲဘားတိုက် အနီးမှာ မနေ့ ညနေ ၆ နာရီခန့်က ဗုံး ၂ လုံး ၁၀ မိနစ်ခြား တခါစီပေါက်ကွဲခဲ့ပြီး မပေါက်ကွဲတဲ့ လက်ကျန် ဗုံးတလုံးကို တွေ့ရှိကြောင်း ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးရန်အောင်က ဒီဗွီဘီကို ပြောကြားပါတယ်။
M-150 ပုလင်း အသုံးပြု လက်လုပ်ဗုံးအမျိုးအစားတွေနဲ့ အသေးစားပေါက်ကွဲမှုတွေ အခုရက်ပိုင်း ရန်ကုန်မြို့ထဲမှာ ဖြစ်ပွားလာခဲ့တာ လေးကြိမ်ရှိနေပြီ ဖြစ်ပါတယ်။