ငါးလသားအရွယ် ၀ံပုလွေ လူသားကလေးငယ်အတွက် မိခင်ရဲ့သောက (ဓာတ်ပုံ)

ကြမ်းပြင်ကော်ဇောပေါ်မှာ လှိမ့်နေတဲ့ ကလေးငယ်ဟာ တခြားသော ၅ လအရွယ် ကလေးငယ်တွေလိုပါပဲ။ ဒါပေမယ့် သူ့ရဲ့ ကျောဘက်၊ လက်တွေ၊ ခြေထောက်တွေမှာတော့ ၀ံပုလွေတ ကောင်လိုမျိုး အမွေးအမျှင်တွေ ထူထူထဲထဲဖုံးအုပ်နေခဲ့တာပါ။ ဒါဟာ hypertrichosis universalis လို့အမည်ရတဲ့ ရောဂါလက္ခဏာတမျိုးနဲ့ ရင် ဆိုင်နေရတာဖြစ်ပြီး လူသန်းတထောင်မှာမှ တယောက်ဖြစ်နိုင်ချေရှိတဲ့ မျိုးဗီဇဆိုင်ရာအ ခြေအနေတခုဖြစ်တယ်လို့ မေရာသတင်းတပုဒ်မှာ ဖော်ပြပါတယ်။ သူတို့ဟာ အိန္ဒိယနိုင်ငံအလယ်ပိုင်း၊ ပျွန်းမြို့မှဖြစ်ပြီး မိခင်ဖြစ်သူ အသက် ၂၂ နှစ် အရွယ် မန်နီရှာ ဆန်ဘာဂျီရောက်တ်ဟာ သားငယ်အတွက် စိတ်သောကရောက်နေခဲ့ရ တာပါ။ သူ့ရဲ့ အစ်မဖြစ်သူနဲ့ ညီမဖြစ်သူတို့ဟာလည်း ခုလိုပဲ မျိုးဗီဇဆိုင်ရာ အခြေအနေ မျိုးရှိနေခဲ့တယ်လို့ ဆိုပါတယ်။ “ကျမ ကိုယ့်ကိုယ်ကို မှန်ထဲမှာတွေ့ရတိုင်း ရွံရှာစက်ဆုတ်သလိုခံစားခဲ့ရတယ်။ ခုတော့ ကျမရဲ့ သားလေးမှာပါ ဒီဒဏ်ရာတွေ ရလာခဲ့ပြီ။ ကျမတို့ ညီအမတွေဟာ အမြဲတမ်းပဲ သရဲတစ္ဆေ၊ ၀က်ဝံ၊ မျောက်တွေလို နောက်ပြောင်ခံခဲ့ရတယ်။ ကျမသားလေးကို ခု လိုခံစားရမှာမျိုး မဖြစ်စေချင်ပါဘူး။ ဘာပဲဖြစ်ဖြစ် သူဟာ ကျမရဲ့ ရင်သွေးပဲလေ။ သူ့ကို ကျမ ချစ်ပါတယ်။ ကျမရဲ့ တခုတည်းသော ဆန္ဒကတော့ သူ့ကို တခြားသာမန်ကလေး တွေလိုပဲ ကြီးပြင်းစေလိုတာပါပဲ”လို့ သူက ပြောပါတယ်။ မန်နီရှာနဲ့ ခင်ပွန်းဖြစ်သူ အသက် ၃၀ အရွယ် ဗီသဲလ်တို့ဟာ သကြားလုံးဆိုင်ဖွင့် ထားကြတာဖြစ်ပြီး ပြီးခဲ့တဲ့နှစ် မေလ ၂၅ ရက်နေ့ကမှ လက်ထပ်ခဲ့ကြတာပါ။ “ကျမရဲ့ ခင်ပွန်းကတော့ သူ့သားလေးကို တော်တော်လည်း ချစ်ပြီး ပံ့ပိုးပေးပါတယ်။ ဒါပေမယ့် ယောက္ခမတွေကတော့ မပျော်ရွှင်ကြဘူးပေါ့။ ကျမရဲ့ ယောက္ခမက ကလေးကို ရုပ်ဆိုးပြီး မျောက်ကလေးနဲ့ တူတယ်လို့ ပြောလို့ ကျမ စိတ်ဆိုးနာကျင်ခဲ့ရတယ်။ ဒါပေမယ့် ဘာမှ မတတ်နိုင်ပါဘူး”လို့ မန်နီရှာက ပြောပါတယ်။ ဒီရောဂါနဲ့ ပတ်သက်ပြီး ကုသနိုင်မယ့် ကုထုံးမရှိသေးတာမို့ မာနီရှာတို့ ညီအမတွေဟာ မျက်နှာပေါ်မှ အမွေးအမျှင်တွေကို ဖုံးအုပ်ဖို့ နှစ်ပေါင်းများစွာ မိတ်ကပ်တွေ၊ ခရင်မ်တွေနဲ့ ထူထူပိန်းပိန်း လိမ်းခြယ်ထားခဲ့ကြရတာပါ။ ဒါပေမယ့် ကလေးငယ်ကတော့ သိပ်ငယ်လွန်းပြီး အသားအရေကလည်း နူးညံ့တာမို့ ခုလိုလိမ်းခြယ်ပေးဖို့ မဖြစ်နိုင်သေးဘူးလို့ သူက ပြောပါတယ်။  

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up