ရခိုင်ပြည်နယ် အကျိုးစီးပွားအတွက် အကြံပြုချက်ပေးရန် ရည်ရွယ်ဟု ကိုဖီအာနန် ပြော
DVB
·
September 9, 2016
ရခိုင်ပြည်နယ်ဆိုင်ရာ ကော်မရှင်ဖွဲ့စည်းထားတာဟာ လူ့အခွင့်အရေး ကိစ္စရပ်တွေကို ဝင်ရောက်စွက်ဖက်ဖို့မဟုတ်ဘဲ ရခိုင်ပြည်နယ် အသိုက်အဝန်းတခုလုံး အကျိုးစီးပွားအတွက် အကြံပြုချက်တွေပေးဖို့ အဓိကရည်ရွယ်ထားတာလို့ မစ္စတာ ကိုဖီအာနန်က ပြောပါတယ်။
ရခိုင်ပြည်နယ်ဆိုင်ရာ အကြံပေးကော်မရှင် ဥက္ကဋ္ဌဖြစ်သူ မစ္စတာ ကိုဖီအာနန်ဟာ ရခိုင်ပြည်နယ်ခရီးစဉ်အပြီး စက်တင်ဘာ ၈ ရက်နေ့က ဆူးလေ ရှန်ဂရီလာဟိုတယ်မှာ သတင်းစာရှင်းလင်းပွဲတခု ပြုလုပ်ခဲ့ရာမှာ ပြောဆိုလိုက်တာပါ။
မြန်မာနိုင်ငံအတွက် ရခိုင်ပြည်နယ်ဆိုင်ရာ အကြံပေးကော်မရှင်ဖွဲ့ရာမှာ နိုင်ငံခြားသား ၃ ဦး ပါဝင်တာနဲ့ပတ်သတ်ပြီး ရခိုင်ဒေသခံတွေက ကန့်ကွက်ခဲ့ကြပါတယ်။
ဒါနဲ့ပတ်သက်ပြီး တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၊ သမ္မတကြီးတို့နဲ့ တွေ့ဆုံခဲ့ရာမှာလည်း ကော်မရှင်အပေါ် ပံ့ပိုးသွားမယ်လို့ ပြောဆိုခဲ့တာကြောင့် နိုင်ငံခြားသား ၃ ဦးအရေး ထားခဲ့လို့ရပြီလို့ ကိုဖီအာနန်က သတင်းစာရှင်းလင်းပွဲမှာ သတင်းထောက်တဦးရဲ့ အမေးကို ပြန်လည်ဖြေကြားခဲ့ပါတယ်။
ဘင်္ဂါလီလူမျိုးတွေနဲ့ တံခါးပိတ်ဆွေးနွေးမှုတွေ ပြုလုပ်ခဲ့ရာမှာ ဘင်္ဂါလီလူမျိုးတွေဘက်က စားဝတ်နေရေး အလုပ်အကိုင် အခွင့်အလမ်းနဲ့ လွတ်လပ်စွာ သွားလာခွင့်ရရှိဖို့ ဆန္ဒရှိနေကြတယ်လို့ သူကဆက်ပြောပါတယ်။
နောက်ဆုံးအနေနဲ့ ရခိုင်ပြည်နယ်ဆိုင်ရာ အကြံပေးကော်မရှင်အဖွဲ့အနေနဲ့ ရခိုင်ပြည်နယ် အသိုက်အဝန်းတခုလုံး တိုးတက်ဖို့ကိုပဲ အကြံပြုချက် တင်ပြသွားမှာဖြစ်ပြီး ဘက်လိုက်မှု မရှိစေရဘူးလို့ ကတိပေး ပြောဆိုသွားပါတယ်။
