ကရင်ပြည်နယ်၊ ဘားအံစက်မှုဇုန်အနီးမှာ ဒီကနေ့မနက် ၉ နာရီကျော်က လက်လုပ်မိုင်းတလုံး ပေါက်ကွဲမှုဖြစ်ပွားခဲ့တယ်လို့ ဘားအံမြို့မရဲစခန်းက ဒုရဲအုပ်သက်နိုင်ဦးက ဒီဗွီဘီကို ပြောပါတယ်။ ပေါက်ကွဲမှုဟာ ဘားအံစက်မှုဇုန်(၂)၊  ဘားအံ-ထီးဖိုးကလုံးကျေးရွာသွားကားလမ်း၊ မဟာ အထည်ချုပ်စက်ရုံရှေ့ ညောင်ပင်ခြေရင်းမှာ ပေါက်ကွဲခဲ့တာဖြစ်ပြီး  မည်သူမည်ဝါရဲ့ လက်ချက်ဆို တာကိုတော့ ရဲတပ်ဖွဲ့က စုံစမ်းနေဆဲပဲလို့ ပြောပါတယ်။ ပေါက်ကွဲမှုကြောင့် လူတွေထိခိုက်သေဆုံးမှုမရှိပေမယ့် ပေါက်ကွဲစေတတ်တဲ့ ၀တ္ထုပစ္စည်းများ အက်ဥပဒေပုဒ်မ (၃) နဲ့ အမှုဖွင့်ထားပြီး ဆက်လက်စုံစမ်းနေတယ်လို့ ဒုရဲအုပ် သက်နိုင်ဦးက ပြောပါတယ်။ ဒီပေါက်ကွဲမှုနဲ့ ပတ်သက်ပြီး အစိုးရပြန်ကြားရေးကလည်း အတည်ပြု သတင်းထုတ်ပြန်ပါတယ်။ ပေါက်ကွဲမိုင်းဟာ ၂ လက်မပတ်လည်အရှည် ၆ လက်မခန့်ရှိ သံပိုက်လုံးအတွင်းမှာ  TNT ယမ်း၊ ပန်တိုပလပ်ယမ်းတွေ ထည့်ထားတဲ့အပြင် ကော့တက်စ်အားမြှင့် ယမ်းကြိုး ၁ ချောင်းကို ထပ်မံဖြည့်သွင်းပြီး ဓာတ်ခဲ ၂ လုံးနဲ့ ချိန်ကိုက်ဖောက်ခွဲတာ ဖြစ်နိုင်တယ်လို့ သတင်းမှာဖော်ပြပါတယ်။ [caption id="attachment_165289" align="aligncenter" width="960"] ဓာတ်ပုံ - MOI[/caption] မိုင်းပေါက်ကွဲမှုဖြစ်ပွားချိန် ကားလမ်းမပေါ်မှာ လူနဲ့ယာဉ်တွေ ဖြတ်သန်းသွားလာတာမရှိလို့  ထိခိုက်သေဆုံးမှုမရှိဘဲ ညောင်ပင်ကတော့ ကားလမ်းပေါ် လဲကျသွားခဲ့ကြောင်းနဲ့ ဘယ်အဖွဲ့အစည်းရဲ့ လက်ချက်လဲဆိုတာ မသိရှိသေးဘူးလို့လည်း ဆိုပါတယ်။