လ၀န်းထက်သာ အထည်ချုပ်စက်ရုံအလုပ်သမားများ နစ်နာကြေးရရှိ
DVB
·
July 18, 2016
စက်ရုံပိတ်သွားတဲ့ လှိုင်သာယာမြို့နယ် ရွှေလင်ဗန်းစက်မှုဇုန်၊ လဝန်းထက်သာ အထည်ချုပ် စက်ရုံက အလုပ်သမား ၈၅ ဦးအတွက် နစ်နာကြေးတွေကို ဒီနေ့ လှိုင်သာယာမြို့နယ် ညှိနှိုင်း ဖြန်ဖြေရေးရုံးမှာ စက်ရုံဘက်က လာထုတ်ပေးခဲ့ပါတယ်။
ဒီစက်ရုံဟာ ဇွန်လ ၂၅ ရက်နေ့က စက်ရုံပိတ်လိုက်တာဖြစ်ပြီး အလုပ်သမား တွေရဖို့ရှိတဲ့ နစ်နာကြေး ၃ မျိုးထဲက နို့တစ်ကြေးနဲ့ အလုပ်ထုတ်နစ်နာကြေးတွေကို ထုတ်ပေးခဲ့ပါတယ်။
ဒီနစ်နာကြေး ၂ မျိုးအတွက် အလုပ်သမား ၈၅ ဦးဟာ ကျပ်သိန်း ၂၉၀ ကျော်ရရှိခဲ့ပြီး လုပ်သက်ခံစားခွင့်ကြေးတွေရဖို့ ကျန်နေပါသေးတယ်။
လဝန်းထက်သာ အထည်ချုပ်စက်ရုံက အလုပ်သမားတွေဟာ ဒီလို နစ်နာကြေးတွေရရှိဖို့ အတွက် ဇူလိုင်လ ၇ ရက်နေ့နဲ့ ဇူလိုင်လ ၁၆ ရက်နေ့တွေက လှိုင်သာယာမြို့နယ်ထဲမှာ လမ်းလျှောက်ဆန္ဒဖော်ထုတ်ခဲ့ကြပါတယ်။
ဇွန်လ ၂၅ ရက်နေ့က ပိတ်သွားတဲ့ လဝန်းထက်သာ အထည်ချုပ် စက်ရုံက အလုပ်သမားတွေရဲ့ ဇွန်လလုပ်ခလစာတွေကို ဇူလိုင်လ ၇ ရက်နေ့က ထုတ်ပေးခဲ့ပါတယ်။
