ကျေးရွာဘောလုံးပြိုင်ပွဲအတွင်း ခိုက်ရန်ဖြစ်ပွားခဲ့မှုကြောင့် ကစားသမား ၁ ဦး သေဆုံး

တောင်ငူခရိုင် အုတ်တွင်းမြို့နယ် ရပ်ကျေးရွာအုပ်စု အသက် ၂၀ နှစ်အောက် ဘောလုံးပြိုင်ပွဲမှာ ကျေးရွာအသင်းအချင်းချင်း ယှဉ်ပြိုင်ကစားစဉ် ခိုက်ရန်ဖြစ်ပွားပြီး ထိုးကြိတ်ကန်ကျောက်ခံရတဲ့ ၁၆ နှစ်အရွယ် ဘောလုံးကစားသမားတဦး မနေ့က နေပြည်တော် ခုတင် ၁၀၀၀ ဆေးရုံကြီးမှာ ကွယ်လွန်သွားခဲ့တယ်လို့ သိရပါတယ်။ ပဲခူးတိုင်းဒေသကြီး တောင်ငူခရိုင် အုတ်တွင်းမြို့ ပဲခူးလမ်းရပ်ကွက်ရှိ မြို့နယ်အားကစားကွင်းမှာ ခရိုင်အား/ကာဦးစီဌာန နှင့် မြို့နယ်အား/ကာဦးစီးဌာနတို့က ပူးပေါင်းပြီး အသက် ၂၀ နှစ်အောက် အားကစားဖွံ့ဖြိုး တိုးတက်ရေး အစီအစဉ်အရ ဇူလိုင် ၅ ရက်နေ့က ပြုလုပ်ခဲ့တဲ့ ဘောလုံးပွဲမှာ မဲကုန်းကျေးရွာ အသင်းနဲ့ ဝဲဒေါင့်ကျေးရွာအသင်းတို့ ယှဉ်ပြိုင်ကစားစဉ် ၀ဲဒေါင့်ကျေးရွာ အုပ်စုမှ အသက် ၁၆ နှစ်အရွယ် ကိုညီညီလင်းအောင်မှာ မဲကုန်းကျေးရွာအသင်းသားများရဲ့ ၀ိုင်းဝန်းထိုးကြိတ်ကန်ကြောက်မှုကြောင့် ဇူလိုင် ၆ ရက်နေ့ မနက် ၄ နာရီ ၅၀ မိနစ်အချိန်မှာ နေပြည်တော်ခုတင် ၁၀၀၀ ဆေးရုံကြီးမှာ ကွယ်လွန်သွားခဲ့တယ်လို့ဝဲ ဒေါင့်ကျေးရွာ ဘောလုံးအသင်း တာဝန်ရှိသူ ဦးဌေးလွင်က ပြောပါတယ်။ ပထမပိုင်း မိနစ် ၃၀ လောက်မှာ ဝဲဒေါင့်အသင်းက ကျောနံပါတ် ၁၂ ကစားပုံကြမ်းတမ်းတဲ့အတွက် မဲကုန်း အသင်းက ကျောနံပါတ် ၁၀ နဲ့ ကျောနမ်ပတ် ၂ တို့က လက်သီးနဲ့ ထိုးပြီး မဲကုန်းအသင်းအုပ်ချုပ်သူနဲ့ ကွင်းအနီး မြက်ဖြတ်စက်နဲ့ မြက်ဖြတ်နေသူတို့ကပါ ကွင်းအတွင်းဝင်ရောက်ထိုးတာကြောင့် ခရိုင်အား/ကာဦးစီမှူး ဦးသူရိန်ထွန်းနဲ့ တာဝန်ရှိသူတွေက ဝိုင်းဝန်းဖြေရှင်းပေးခဲ့ ပြီးနောက် ဆက်လက် ကစားစေခဲ့ပါတယ်။ ဒုတိယပိုင်းမှာ ထပ်မံခိုက်ရန်ဖြစ်ပွားခဲ့ပြီး မဲကုန်းအသင်းသားများမှ ၀ိုင်းဝန်းထိုးကြိတ် ကန်ကြောက်ခဲ့တာကြောင့် ကိုညီညီလင်းအောင်တွင် ဦးခေါင်းအတွင်းသွေးယိုစိမ့်ဒဏ်ရာနဲ့ ဆီးအိမ်ကွဲဒဏ်ရာများရရှိကာ သေဆုံးခဲ့တာဖြစ်တယ်လို့ ပြောပါတယ်။ အုတ်တွင်းမြို့မရဲစခန်းသို့ သွားရောက်ဆက်သွယ်မေးမြန်းရာစခန်းမှူး ဒုရဲမှူးဇော်လွင်မှ မဲကုန်းကျေးရွာအုပ်ချုပ်ရေးမှူး၊ အသင်းအုပ်ချုပ်သူနှင့် ဘောလုံးအသင်းသား (၁၁) ဦး၊ စုစုပေါင်း ၁၃ ဦးကို အုတ်တွင်းမြို့မရဲစခန်းတွင် (ပ)၁၃၅/၂၀၁၆ ပြစ်မှုပုဒ်မ-၃၀၂/၁၁၄ တို့ဖြင့် အမှုဖွင့်လှစ်ထားရှိပြီး ဆက်လက်စုံစမ်းစစ်ဆေးနေတယ်လို့ သိရပါတယ်။ အမှုဖွင့်လှစ်ခံရတဲ့ မဲကုန်းကျေးရွာ အုပ်ချုပ်ရေးမှူး ဦးစီလေးကတော့ အခင်းဖြစ်ချိန်မှာ သူဟာ မြို့ပေါ်ရှိ ရပ်ကွက်အုပ်ချုပ်ရေးမှူးတွေနဲ့အတူ ထိုင်နေတာဖြစ်ပြီး ကွင်းအတွင်းသို့ မ၀င်ရဘူးဆိုတဲ့ အတွက် ၀င်ရောက်ထိန်းသိမ်းပေးနိုင်ခြင်း မရှိခဲ့တာဖြစ်ကြောင်း ပြောပါတယ်။ သတင်း - သားကြီး(တောင်ငူ)၊ ကျော်အောင် (ကညွတ်ကွင်း)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up