မြန်မာလေတပ် ရဟတ်ယာဉ်ပျက်ကျ၊ ၃ ဦးသေဆုံး
DVB
·
June 14, 2016
မြန်မာ့တပ်မတော်(လေ)က အမ်အိုင်-၂ အမျိုးအစား ရဟတ်ယာဉ်တစီး ပဲခူးတိုင်းဒေသကြီး ဒိုက်ဦးမြို့နယ်မှာ ရာသီဥတုဆိုးရွားမှုကြောင့် ဒီကနေ့ မနက်က ပျက်ကျပြီး ၃ ဦး သေဆုံးသွားတယ်လို့ တပ်မတော် ကာကွယ်ရေး ဦးစီးချုပ်ရုံးက အတည်ပြု သတင်းထုတ်ပြန်ပါတယ်။
အမ်အိုင်-၂ အမျိုးအစား တပ်မတော်ရဟတ်ယာဉ်တစ်စီးဟာ ဒီနေ့ မနက်ပိုင်းမှာ မိတ္ထီလာမြို့မှ မှော်ဘီမြို့ကို ပျံသန်းထွက်ခွာလာရာ ဒိုက်ဦးမြို့နယ်အတွင်း ရောက်ရှိပျံသန်းစဉ် ရာသီဥတု ဆိုးရွားတဲ့ အတွက် ရန်ကုန်-မန္တလေး အမြန်လမ်းမကြီး မိုင်တိုင် ၇၂ အနောက်ဘက်ခြမ်းရှိ ဂုံညှင်းချောင်းအနီး လျှိုအတွင်းသို့ ပျက်ကျခဲ့တာလို့ ဆိုပါတယ်။
စစ်ရဟတ်ယာဉ်ဟာ မိတ္ထီလာမြို့ လေတပ်စခန်းဌာနချုပ်မှာ အကြီးစား ပြင်ဆင်စစ်ဆေးတာတွေ ပြုလုပ်ခဲ့ပြီး မြိတ်မြို့ လေတပ်စခန်းဌာနချုပ်ကို ပို့ဆောင်ဖို့ ဒီနေ့ မနက် ၈ နာရီ ၄၀ မိနစ်ခန့်မှာ မိတ္ထီလာမြို့မှစတင် ထွက်ခွာလာတာပါ။ မနက် ၁၀ နာရီခွဲလောက်မှာ တောင်ငူလေတပ်စခန်းဌာနချုပ်မှာ ဆီဖြည့်ရပ်နားခဲ့ပြီး မနက် ၁၁ နာရီခွဲမှာ မှော်ဘီမြို့သို့ ဆက်လက်ထွက်ခွာပျံသန်းစဉ် ရာသီဥတုဆိုးရွားတဲ့အတွက် ပျက်ကျ မီးလောင်ပျက်စီးခဲ့တယ်လို့ တပ်မတော်က သတင်းထုတ်ပြန်ပါတယ်။
ရဟတ်ယာဉ်ပေါ်မှာပါသွားတဲ့ ရဟတ်ယာဉ်မှူး ဗိုလ်မှူး ရန်နိုင်ထူး၊ တွဲဖက်ရဟတ်ယာဉ်မှူး ဗိုလ်ကြီး ထွန်းထွန်းနိုင်နဲ့ ရဟတ်ယာဉ်အဖွဲ့သား တပ်ကြပ်ကြီး တင်ထွန်းလွင်တို့ ၃ ဦး ပျက်ကျတဲ့ နေရာမှာ သေဆုံးသွားခဲ့ပြီး ရဟတ်ယာဉ် ပျက်ကျမှု အခြေအနေကို တာဝန်ရှိသူတွေက စုံစမ်းဖော်ထုတ်နိုင်ရေး စီစဉ်နေတယ်လို့ သိရပါတယ်။
အခင်းဖြစ်ပွားရာနေရာကို ရောက်ရှိနေတဲ့ ဖြူးမြို့နယ် ညောင်ပင်သာကျေးရွာက ဒု-ရဲအုပ် ဇော်မိုးလွင်ကတော့ ပဲခူးရိုးမနဲ့ ၃ မိုင်လောက်ဝေးတဲ့နေရမှကျတာလို့ ဒီဗွီဘီကို ပြောပါတယ်။
“အမြန်လမ်း မိုင်တိုင် ၇၀၊ ၂ ဖာလုံ ပဲခူးရိုးမနဲ့ ၃ မိုင်လောက်ဝေးတယ်။ ဖြစ်တဲ့အချိန်လည်း ကျနော်တို့ စုံစမ်းတုန်းဗျာ။ ဘယ်လိုကြောင့်ဖြစ်တယ်ဆိုတာ ကျနော်တို့ အတည်မပြုနိုင်သေးဘူး။ လေယာဉ်က ပျက်ကျတယ်ဆိုတော့ မီးလောင်တာပေါ့လေ။ သေတာကတော့ ၃ ဦးလို့ပြောတယ်။ တပ်ကတော့ အတိအကျပြောလို့ မရသေးဘူး။”
ဒီနေ့ မနက်ပိုင်းက ဒိုက်ဦးမြို့နယ် ဥသျှစ်ကုန်း ကျေးရွာအနီး ရဟတ်ယာဉ်တစီး ပျက်ကျသွားကြောင်း ဒေသခံတဦး သတင်းပေးချက်အရ ဒိုက်ဦးမြို့နယ် ရဲတပ်ဖွဲ့က သွားရောက် စစ်ဆေးနေတယ်လို့ သိရပါတယ်။
ဓာတ်ပုံ- အောင်စိုးမိုး