မြန်မာသမ္မတ ဦးထင်ကျော်ဟာ ပထမဆုံးပြည်ပခရီးစဉ်အဖြစ် အိမ်နီးချင်း လာအိုနိုင်ငံကို မကြာခင်ချစ်ကြည်ရေးခရီး သွားရောက်မယ်လို့ အစိုးရက တရားဝင်ထုတ်ပြန်ကြေညာထား ပါတယ်။ လာအိုပြည်သူ့ ဒီမိုကရက်တစ်သမ္မတနိုင်ငံ သမ္မတ မစ္စတာ ဘွန်ညံဗိုရာချစ်နဲ့ ဇနီးတို့ရဲ့ ဖိတ်ကြားချက်အရ လာအိုနိုင်ငံကို ဇနီးဖြစ်သူ ဒေါ်စုစုလွင်နဲ့ အတူသွားရောက်မှာဖြစ်တယ်လို့ သတင်းမှာဖော်ပြထားပါတယ်။ လာအိုနိုင်ငံမြို့တော် ဗီယင်ကျန်းမှာရှိတဲ့ မြန်မာသံရုံးကလည်း သမ္မတဦးထင်ကျော် လာရောက် မယ့် သတင်းကို ဒီဗွီဘီကို အတည်ပြုပြောပေမယ့် လာရောက်မယ့် ရက်အတိအကျနဲ့ ခရီးစဉ် အသေးစိတ်ကိုတော့ ပြောကြားခြင်းမရှိပါဘူး။ အလားတူ မေလ ၁၉ ရက်နဲ့ ၂၀ ရက်တွေမှာ ရုရှားနိုင်ငံ ဆိုချီမြို့မှာ ကျင်းပဖို့ရှိနေတဲ့ ရုရှား-အာဆီယံ ထိပ်သီး အစည်းအဝေးပွဲကိုလည်း သမ္မတ ဦးထင်ကျော်နဲ့ နိုင်ငံခြားရေးဝန်ကြီး ဒေါ်အောင်ဆန်းစုကြည်တို့ တက်ရောက်ဖို့ရှိနေတယ်လို့ သတင်းတွေ ထွက်နေပါတယ်။