လှည်းကူးမြို့နယ်တွင် ချောတိုင်တက်ရန် တွင်းတူးရာမှ ကျည်ဆန်များ တွေ့ရှိ
DVB
·
April 17, 2016
ရန်ကုန်တိုင်းဒေသကြီး လှည်းကူးမြို့နယ် ဖောင်ကြီးအုပ်စု၊ ပန်းတောကုန်းကျေးရွာမှာ ဒီနေ့နှစ်ဆန်း ၁ ရက်နေ့ နှစ်စဉ်ကျင်းပနေတဲ့ ချောတိုင်တက်ပွဲပြုလုပ်ဖို့ မြေကြီးတွင်းတူးရာမှ သေနတ်ကျည်ဆန်တွေ တွေ့ရှိခဲ့ပါတယ်။
ရန်ကုန်တိုင်း၊ လှည်းကူးမြို့နယ် ဖောင်းကြီးအရှေ့၊ ပန်းတောကုန်းကျေးရွာနေ လယ်သမား သက်မျိုးလင်း (ခ) ကိုလင်းရဲ အိမ်ခြံအလွတ်အတွင်း ရွာသားတွေက ချောတိုင်တက်ဖို့ မြေကြီးတွင်းတူးဖော်ရာကနေ စတင်တွေ့ရှိခဲ့တာဖြစ်ပါတယ်။
ပန်းတောကုန်း ရွာသားတွေကဖောင်ကြီးရဲစခန်းကို အကြောင်းကြားလို့ ဖောင်ကြီးရဲစခန်းမှူးနဲ့တပ်ဖွဲ့ဝင်တွေ၊ နယ်မြေခံ အက်စ်ပီ၊ စအဖ၊ ကျေးရွာအုပ်ချုပ်ရေးမှူး၊ အမှတ် ၁ စစ်အခြေခံလေ့ကျင့်ရေးတပ်မှတာဝန်ရှိသူတွေနဲ့ လေကြောင်းရန်ကာ ကွယ်ရေးတပ်က တာဝန်ရှိသူတွေ သွားရောက်စစ်ဆေးခဲ့ကြပါတယ်။
စစ်ဆေးတွေ့ရှိချက်အရ အသုံးပြုလို့ရတဲ့ ရိုင်ဖယ်ကျည်အမျိုးအစား ကျည် ၈၅ တောင့်နဲ့ ပျက်စီးကျည် ၆၀ တောင့်တို့ကို တွေ့ရှိခဲ့ပါတယ်။ အဲဒီကျည်ဆန်တွေဟာ ၁၉၄၃ ခုနှစ်ထုတ် ကျည်ဖြစ်ပြီး တာဝန်ရှိသူတွေက ဆက်လက်တူးဖော်ရှာဖွေနေတယ်လို့ သိရပါတယ်။
သတင်းဓာတ်ပုံ - ဦးညိုထွန်း