ရနောင်းတွင် တရားမ၀င် မြန်မာအလုပ်သမား ၄၃ ဦး ဖမ်းဆီးခံရ
DVB
·
February 6, 2016
ထိုင်းနိုင်ငံတောင်ပိုင်း ရနောင်းခရိုင်မှာ တရားမ၀င် ရွှေ့ပြောင်း မြန်မာအလုပ်သမား ၄၃ ဦးကို ထိုင်းလူဝင်မှုကြီးကြပ်ရေး ဦးစီးဌာန (လ၀က) နဲ့ နယ်မြေခံ အာဏာပိုင်တွေ ပူးပေါင်း ဖမ်းဆီးလိုက်ပါတယ်။
မြန်မာနိုင်ငံသားတွေဟာ ထိုင်းနိုင်ငံ ရနောင်းမြို့နယ်ကနေတဆင့် တခြားဒေသမှာ အလုပ်သွားလုပ်ကြဖို့ ရနောင်းခရိုင် ကလပ်ဘူရီမြို့နယ်က ဆီအုန်းခြံတခြံမှာ ခရီးတထောက်နားနေချိန် ဖေဖော်ဝါရီ ၄ ရက်နေ့မှာ ဖမ်းဆီးခံခဲ့ရတာလို့ ထိုင်းမန်နေဂျာ အွန်လိုင်း သတင်းမှာ ဖော်ပြထားပါတယ်။
အဖမ်းခံရတဲ့သူတွေရဲ့ ပြောပြချက်အရ ဟတ်ရိုင် နဲ့ စူခလာမြို့တွေမှာ အလုပ်သွားလုပ်ဖို့ မြန်မာနဲ့ ထိုင်းပွဲစားတွေကို တယောက် ဘတ်ငွေ ၅၀၀၀ ကနေ၊ ၁၉၀၀၀ ပေးရပြီးတော့ ကော့သောင်းမြို့ကနေ လာကြတာလို့ ဆိုပါတယ်။
တရားမ၀င်လာရောက်တဲ့ မြန်မာနိုင်ငံသားတွေကို တရားမ၀င် လာရောက်မှုနဲ့ ရနောင်းမြို့မှာရှိတဲ့ လ၀ကမှာ စစ်ဆေးချက်တွေ ပြုလုပ်ပြီး မြန်မာနိုင်ငံ ပြန်လည်ပို့ဆောင်ပေးသွားမှာ ဖြစ်ပါတယ်။
အဖမ်းခံရသူထဲမှာ အမျိုးသား ၃၈ ဦးနဲ့ အမျိုးသမီး ၅ ဦး ပါဝင်ပြီး ရခိုင်၊ ရန်ကုန်၊ ကော့သောင်းနဲ့ မော်လမြိုင်မြို့တွေက ဒေသခံတွေ ဖြစ်ကြပါတယ်။