မြိတ်မြို့တွင် ထွေအုပ်ရင်ထိုးပါ လူတဦး မဲစာရင်းစာရွက်များ ဆုတ်ဖြဲ
DVB
·
November 8, 2015
တနင်္သာရီတိုင်း မြိတ်မြို့ မြိတ်တောင်ကျေးရွှာအုပ်စု အင်းလေးမြိုင် ၃၊ မဲရုံအမှတ်စဉ် ၁၆ ထဲကို ထွေအုပ်ရင်ထိုးပါ လူတယောက် ၀င်လာပြီး မဲစာရင်းစာအုပ်ထဲက စာရွက်တွေကို ဆုတ်ဖြဲယူသွားတယ်လို့ အဲဒီမဲရုံမှာ ရောက်နေတဲ့ လေ့လာစောင့်ကြည့်သူတဦးက ဒီဗွီဘီကို ပြောပါတယ်။
“မဲရုံထဲကို ၀င်လာတယ်၊ မဲရုံမှူးနဲ့လည်း မတိုင်ပင်ပဲနဲ့ ဒီလူတွေက မဲပေးခွင့်မရှိတဲ့ သူတွေဆိုပြီးတော့ စာရွက် ၃ ရွက်ကို ဆုတ်ဖြဲသွားတာ” လို့ မဲရုံအမှတ်စဉ် ၁၆ မှာ လေ့လာစောင့်ကြည့်နေတဲ့သူက ပြောပါတယ်။
မဲရုံမှူးကတော့ ဘာစာရွက်ဖြဲသွားမှန်း မသိဘူးလို့ပဲ ပြန်လည်ဖြေကြားခဲ့ပါတယ်။
မြိတ်မြို့ရဲ့ မဲရုံတော်တော်များများမှာ မဲပေးလို့မရတဲ့သူတွေလည်း ရှိနေပါတယ်။ မဲစာရင်းမှာ နာမည်မပါလို့ ပုံစံ ၃ နဲ့ အချိန်မီလျှောက်ပေမယ့်လည်း ကော်မရှင်နဲ့ ရပ်ကွက်ရုံးတွေရဲ့ ပေါ့ဆမှုတွေကြောင့် မဲပေးခွင့် ဆုံးရှုံးရတာလို့ မဲပေးခွင့်မရသူတွေက ဆိုပါတယ်။
အိမ်ထောင်စုစာရင်းနဲ့ မှတ်ပုံတင် ရှိတဲ့သူတွေလည်း မဲပေးဖို့ တန်းစီစောင့်နေကျပေမယ့် မဲစာရင်းနာမည်မပါလို့ ပေးခွင့်မရကျပါဘူး။
သတင်း - မြတ်သူအောင်
မြိတ်နှင့်ပုလောမြို့နယ်တို့တွင် မဲပေးနေစဉ်။ (ဓာတ်ပုံ - aw Zaw Myeik)