ဖိလစ်ပိုင် တွင် ပြန်ပေးဆွဲသူများ အသုံးပြုခဲ့သည့် လှေကို တွေ့ရှိ (ရုပ်သံ)

ဖိလစ်ပိုင် ပြန်ပေးသမားတွေ အသုံးပြုခဲ့တဲ့ လှေကို ဖိလစ်ပိုင်နိုင်ငံ ဒါဗောင်းခရိုင် အရှေ့တောင်ဘက်က ကီလိုမီတာ ရာနဲ့ချီ ဝေးကွာတဲ့နေရာမှာ ပြန်တွေ့ခဲ့ပါတယ်။ ဖိလစ်ပိုင်တောင်ပိုင်း မင်းဒနောင်းကျွန်းပေါ်က အကြီးဆုံးမြို့ ဒါဗာအိုနားက အိုးရှန်းဗျူး အပန်းဖြေစခန်းကို လက်နက်ကိုင် အဖွဲ့တဖွဲ့က စက်တင်ဘာ ၂၁ ရက်နေ့မှာ စီးနင်းကာ ကနေဒါခရီးသည် ၂ ဦး၊ နော်ဝေအပန်းဖြေစခန်း မန်နေဂျာနဲ့ ဖိလစ်ပိုင် အမျိုးသမီး ၁ ဦးကို ဖမ်းဆီးသွားခဲ့ပြီး နောက်တနေ့မှာ ပြန်တွေ့တာပါ။ ဖိလစ်ပိုင် လုံခြုံရေးတပ်ဖွဲ့တွေကလည်း ဖမ်းဆီးခံထားရသူတွေကို ရှာဖွေနိုင်ဖို့အတွက် သတင်းပေးကြဖို့ စက်တင်ဘာ ၂၄ ရက်နေ့မှာ မေတ္တာရပ်ခံလိုက်ပါတယ်။ မင်ဒါနောင် အရှေ့ဘက် စစ်ဌာနချုပ် ပြောခွင့်ရ ကပ္ပတိန် အဲလ်ဘတ်ထ် ကာဘယ်က “ကျနော်တို့ ပြောနိုင်သမျှကတော့ ဒီ မင်ဒါနောင်ကျွန်း အရှေ့ဘက်မှာ သွားစရာတွေ ရှိနေပါတယ်။ ပြန်ပေးဆွဲသူတွေလည်း နားစွင့်နေပြီး လှုပ်ရှားမှု လုပ်ပါလိမ့်မယ်။ ဒါပေမယ့် ကျနော်တို့စိတ်ပူတာက ပြန်ပေးဆွဲခံရသူတွေကို ဘေးကင်းကင်း ကယ်နိုင်ဖို့ပါ။” လို့ ပြောပါတယ်။ လုံခြုံရေးတပ်ဖွဲ့ဝင်တွေကလည်း သူတို့ သံသယရှိထားသူ ၁ ဦးရဲ့ ပုံကြမ်းရေးဆွဲထားတာတွေကို ဖြန့်ဝေထားတယ်လို့ ပြောပါတယ်။ ဒီပုံကြမ်းကလည်း ပြန်ပေးဆွဲ ဖမ်းဆီးမှုကနေ လွတ်မြောက်လာတဲ့ ဂျပန်အမျိုးသမီး ပြောပြတဲ့ ရုပ်သွင်ဖော်ပြချက်အပေါ် အခြေခံ ရေးဆွဲထားတာလို့ ဆိုပါတယ်။ “ကျနော်တို့ ဒီနယ်မြေခံတွေဆီက သတင်းအချက်အလက်တွေ လိုအပ်ပါတယ်။ ဒါကြောင့် သံသယဖြစ်စရာ လူတွေ သို့မဟုတ် နိုင်ငံခြားသားတွေကို တွေ့မိရင် အနီးဆုံး ရဲစခန်း (သို့) စစ်တပ်ဂိတ် တခုခုကို ချက်ချင်းသတင်းပို့ဖို့ ဒီကမ်းခြေတလျှောက် ဒေသခံတွေကို မေတ္တာရပ်ခံထားတာပါ။” သေနတ်သမားတွေနဲ့ ဓားစာခံတွေ ရှိနေနိုင်မယ့် နေရာကို ရှာဖွေနိုင်ဖို့အတွက် အဖွဲ့တဖွဲ့ကလည်း ပြန်ပေးသမားတွေကို ဖော်ထုတ်သိရှိနိုင်ဖို့ စီစီတီဗီတိပ်ခွေတွေကို ပြန်ကြည့်နေပြီး ရနိုင်သမျှ ဗွီဒီယိုပြကွက်တွေနဲ့ ပုံကြမ်းရေးဆွဲထားချက်တွေကို ပြည်သူတွေဆီ ထုတ်ပြသွားမှာ ဖြစ်ပါတယ်။ လက်နက်ကိုင်အဖွဲ့နဲ့ ဓားစာခံတွေဟာ ဒီနယ်မြေထဲမှာပဲ ရှိနေမယ်လို့ ယုံကြည်ထားတဲ့အတွက် လုံခြုံရေးတပ်ဖွဲ့တွေကို ဝေဟင်၊ ရေပြင်၊ မြေပြင် နေရာ ၃ ရပ်မှာ ရှာဖွေရေးလုပ်ဖို့ အင်အားတိုးထားပြီး ရဲနဲ့စစ်သား အကူအင်အားတွေကိုလည်း ဒါဗောင်နယ်မြေထဲမှာ ထပ်တိုး တပ်ချထားပါတယ်။

More News
Up