ပါကစ္စတန် ၀န်ကြီးချုပ်ဟောင်းကို အဂတိလိုက်စားမှုဖြင့် ဖမ်းဝရမ်းထုတ်

ဓာတ်ပုံ - အေအက်ဖ်ပီ
ပါကစ္စတန် အဂတိလိုက်စားမှု တိုက်ဖျက်ရေး တရားရုံးဟာ သြဂုတ် ၂၇ ရက်နေ့က ဝန်ကြီးချုပ်ဟောင်း ယူဆဲ့ဖ် ရာဇာ ဂီလာနီကို အဂတိလိုက်စားမှု စွဲချက်နဲ့ ဖမ်းဝရမ်း ထုတ်လိုက်ပါတယ်။ ကုန်သွယ်ရေး ဖွံ့ဖြိုးတိုးတက်မှု အစီအစဉ်အတွင်း ဘက်လိုက်ပြီး ဒေါ်လာသန်းချီ လာဘ်ယူမှုနဲ့ စွဲချက်တင်တာလို့ လုံခြုံရေး အရာရှိတယောက်က ပြောပါတယ်။ အဲဒီနေ့မှာပဲ အတိုက်အခံဖြစ်တဲ့ ပါကစ္စတန် ပြည်သူ့ပါတီ (ပီပီပီ) ရဲ့ အကြီးတန်း အထင်ကရ လူတယောက်ကို ဖမ်းဆီးခဲ့ပြီး အကြမ်းဖက်အဖွဲ့ ဘဏ္ဍာရေးထောက်ပံ့မှုနဲ့ တရားရုံးမှာ စွဲချက်တင်ခဲ့ပါတယ်။ ပီပီပီပါတီကတော့ ရန်သူဟာ တရားရုံးတွေကို သုံးပြီး အသရေဖျက်တဲ့ လှုပ်ရှားမှုကို လုပ်နေတယ်လို့ စွပ်စွဲခဲ့ပါတယ်။ ဂီလာနီဟာ ပီပီပီပါတီ အစိုးရဖွဲ့ချိန် ၂၀၀၈ မတ်လက စပြီး ဝန်ကြီးချုပ် ဖြစ်လာပြီး ၂၀၁၂  ဧပြီမှာတော့ ပါကစ္စတန် တရားရုံးချုပ်က သူ့ကို ရာထူးချခဲ့ပါတယ်။ လက်ရှိမှာတော့ သူဟာ သူ့ပါတီရဲ့ ဒု-ဥက္ကဋ္ဌ ဖြစ်ပါတယ်။ ဂီလာနီနဲ့ အကြီးတန်း ပါတီခေါင်းဆောင် မခ်ဒွန်းမ် အာမင် ဖာဟင်းတို့ကို ဖမ်းဝရမ်း ထုတ်ထားတယ်လို့ ပြည်ထောင်စု ထောက်လှမ်းရေး အေဂျင်စီ၊ အဂတိလိုက်စားမှု တိုက်ဖျက်ရေးအဖွဲ့က အရာရှိ ဂျဗက် အက္ကဘာ ရီယက်ဇ်က ပြောပါတယ်။ သူတို့ ၂ ယောက်ကို စက်တင်ဘာ ၁၀ ရက်မတိုင်ခင် တရားရုံးကို လာဖို့လည်း အမိန့်ထုတ်ထားပါတယ်။ ဒီနှစ် စစ်တပ်က အဂတိလိုက်စားမှု တိုက်ဖျက်ရေးနဲ့ အကြမ်းဖက်မှု နှိမ်နင်းရေးအတွင်း ပီပီပီပါတီကို ပထမဆုံး အရေးယူမှုလည်း ဖြစ်ပါတယ်။ ဝေဖန်ရေးသမားတွေကတော့ အာဏာသိမ်းလေ့ရှိတဲ့ သမိုင်းကြောင်းနဲ့ စစ်တပ်ဟာ အရပ်ဘက် နိုင်ငံရေးစနစ်ကို အားနည်းအောင် လုပ်နေတယ်လို့ ပြောပါတယ်။ စစ်တပ်ကတော့ နှိမ်နင်းမှုဟာ ပါကစ္စတန် အစိုးရအတွင်း အဂတိလိုက်စားမှုနဲ့ အကြမ်းဖက်မှု သံသရာကို ချိုးဖျက်ဖို့ လိုအပ်တယ်လို့ ပြောပါတယ်။ ဒါပေမယ့် စစ်တပ်ဟာ အတိုက်အခံ နိုင်ငံရေးသမားတွေကိုသာ အများဆုံး ပစ်မှတ်ထားပြီး လက်ရှိဝန်ကြီးချုပ် နဝပ်ဇ် ရှာရစ်ဖ်ရဲ့ ပါတီကိုတော့ ပစ်မှတ်မထားပါဘူး။

More News
Up