အကြမ်းဖက်အဖွဲ့ ဖမ်းထားသည့် ဖိလစ်ပိုင်တပ်ဖွဲ့ဝင် ၂ ဦး ထွက်ပြေးလွတ်မြောက်

ပြန်လည်လွတ်မြောက်လာသည့် ဖိလစ်ပိုင်တပ်ဖွဲ့ဝင် ၂ ဦး။ (ဓာတ်ပုံ - ရိုက်တာ)
ဖိလစ်ပိုင် အစ္စလာမ္မစ်အကြမ်းဖက် အဘူ ဆာယက်ဖ် (Abu Sayyaf) အဖွဲ့က ဓားစာခံအဖြစ် ဖမ်းဆီးခဲ့တဲ့ ဖိလစ်ပိုင်တပ်ဖွဲ့ဝင် ၂ ဦးဟာ သြဂုတ် ၁၉ ရက်ညက သူတို့ကို သွားရောက်ကယ်ဆယ်တဲ့ တိုက်ပွဲအတွင်း ထွက်ပြေးလွတ်မြောက်လာကြပါတယ်။ ဖိလစ်ပိုင်နိုင်ငံတောင်ပိုင်းက ဇူးလူးပြည်နယ်မှာ ၂ နာရီကြာ တိုက်ပွဲအတွင်း ထွက်ပြေးလွတ်မြောက်လာကြတာပါ။ အကြမ်းဖက်အဖွဲ့ဟာ သေးငယ်ပေမယ့် ဖိလစ်ပိုင်နိုင်ငံတောင်ပိုင်းမှာ လွတ်လပ်တဲ့ အစ္စလာမ္မစ်နိုင်ငံတော် ထူထောင်ဖို့ တိုက်ပွဲဝင်နေပြီး မကြာခဏ  ပြန်ပေးဆွဲလေ့ရှိပါတယ်။ ဖိလစ်ပိုင်တပ်ဖွဲ့ဝင် ဓားစာခံတဦးက တိုက်ပွဲဟာ သူတို့ရှိနေတဲ့နေရာနဲ့ ၁၅ မီတာလောက် အရောက်မှာ ဒါဟာ ထွက်ပြေးဖို့ အခွင့်အခါကောင်းပဲဆိုပြီး ထွက်ပြေးခဲ့တာလို့ သတင်းထောက်တွေကို ပြောပြပါတယ်။ ဓားစာခံ ၂ ယောက် အခွင့်အရေးရသလို ထွက်ပြေးခဲ့ကြပေမယ့် သြဂုတ် ၂၀ ရက်နေ့က ဆေးရုံမှာ ပြန်ဆုံကြမှ သူတို့ ၂ ဦးလုံး ထွက်ပြေးလွတ်မြောက်လာမှန်း သိရှိကြတာပါ။ သူတို့ကို သွားကယ်ဆယ်တဲ့ တိုက်ပွဲအတွင်းမှာ စစ်သွေးကြွ ၁၅ ဦးလောက်  သေဆုံးတယ်လို့ ဖိလစ်ပိုင်စစ်တပ်က ဆိုပါတယ်။ ဒီဖိလစ်ပိုင်ကမ်းခြေစောင့် တပ်ဖွဲ့ဝင် ၂ ဦးဟာ ပြီးခဲ့တဲ့ မေလက ပြန်ပေးဆွဲခံခဲ့ရတာပါ။ ပြီးခဲ့တဲ့တပတ်က ကျေးရွာအာဏာပိုင်တဦးကို ခေါင်းဖြတ်သတ်ခဲ့ပြီး ဒီတပ်ဖွဲ့ဝင် ၂ ဦးကိုလည်း ပြန်ပေးငွေမရလို့ သတ်ဖြတ်မယ်လို့ ခြိမ်းခြောက်ထားတာပါ။ အကြမ်းဖက်အဖွဲ့ဟာ မလေးရှားနိုင်ငံသားနဲ့ နယ်သာလန်နိုင်ငံသား တဦးတို့ကို  ဖမ်းဆီးထားပြီး ပြီးခဲ့တဲ့ ဒီဇင်ဘာလက ဆွစ်ဇာလန်နိုင်ငံသားတဦးကို ပြန်လွှတ်ပေးခဲ့ပါတယ်။

More News
Up