(၁) “ဘုရားသခင်ကို ကြောက်ရွံ့ရသော အကြောင်းသည် မတရားသောသူ၏ မျက်စိ၌ မထင်ဟု ထိုသူပြုတတ်သော ဒုစရိုက်ကို ငါထောက်၍ သဘောကျ၏။ သူ၏အပြစ်ကို တွေ့တော်မမူ။ ရွံရှာတော် မမူဟု ကိုယ့်မျက်စိရှေ့၌ကိုယ် ကောင်းသောအရောင်ကို ဆောင်တတ်၏။ သူပြောသော စကားသည် အဓမ္မစကားဖြစ်၏။ ကောင်းသောအကျင့်ကို ကျင့်စေတတ်သော ပညာကို စွန့်လေသည်။ အိပ်ရာပေါ်မှာ မကောင်းသောအမှုကို ကြံစည်တတ်၏။ မကောင်းသောလမ်းကို အမြဲလိုက်၍ ဆိုးယုတ်သော အကျင့်ကို ရွံရှာစေ၏။” ဆာလံကျမ်း ၃၆ (သမ္မာကျမ်း) မြန်မာ့နိုင်ငံရေး ဇာတ်ခုံတွင် လုပ်ကြံမှု အတော်များများ ဖြစ်ခဲ့လေသည်။ လူပုဂ္ဂိုလ် လုပ်ကြံမှုများအပြင် လူမျိုးအချင်းချင်း၊ ဘာသာအချင်းချင်း အဓိကရုဏ်းများ အုပ်စုလိုက်သတ်ဖြတ်မှုများ ဖြစ်ပေါ်အောင်လည်း လုပ်ကြံဖန်တီးလျက်ရှိသည်။ ထိုသို့ လုပ်ကြံမှုများမှာ ဗြိတိသျှအစိုးရ လက်ထက်ကတည်းက ယခုအထိ မရိုးနိုင်စွာ ရှိနေသော လုပ်ကြံမှုများ ဖြစ်၏။ ဗြိတိသျှအစိုးရသည် ဒေါက်တာဘမော်၏ ညွန့်ပေါင်းအစိုးရကို ဖွဲ့စည်းပေးလိုက်သည့်အချိန်၌ အင်္ဂလိပ်ကုန်သည်ကြီးများနှင့် အိန္ဒိယကုန်သည်ကြီးများ၏ ကုန်သည်ကိစ္စ၊ သူပုန်ဂဠုန်ကိစ္စ၊ ဝံသာနုအသင်းများကို မတရားသင်း ကြေညာထားသော ကိစ္စများနှင့် အကျပ်အတည်းရိုက်နေချိန်ကာလတွင် မွတ်ဆလင်ဘာသာဝင် ကျောင်းဆရာ ဦးရွှေဖီ၏ တိုက်တွန်းချက်အရ မော်လဝီနှင့် ယောဂီသြဝါဒစာတမ်း ထွက်ပေါ်လာပြီးနောက် ထိုစာတမ်းကို ဗုဒ္ဓဘာသာဝင်များက မကျေနပ်ကာ ကုလား-ဗမာ အဓိကရုဏ်း ဖြစ်ခဲ့ရ၏။ အစိုးရကိုယ်တိုင်က ထွက်ပေါက်ရှာ အာရုံပြောင်းသည့်အနေဖြင့် ဖန်တီးခဲ့ခြင်းဖြစ်သည်ဟု နိုင်ငံရေးသမားများက ဆိုကြသည်။ ရန်ကုန်မြို့တွင် ကုလားနှင့် ဗမာတို့သည် အုပ်စုလိုက် ရိုက်ပွဲများ ဖြစ်လာချိန်၌ ဂေါ်ယာပုလိပ်များနှင့် ကုလားပုလိပ်များက အဓိကရုဏ်းကို တားဆီးခဲ့သော်လည်း နယ်များအထိ ပျံ့နှံ့သွားသည်။ နောက်ဆုံး အင်္ဂလိပ်ဘုရင်ခံက ပုဒ်မ ၁၄၄ ထုတ်ကာ နှိမ်နင်းခဲ့သဖြင့် လူ ၁၈၁ ယောက် သေဆုံး၊ ဒဏ်ရာရသူ ၈၅ ယောက်ရှိသည်ဟု အစိုးရအစီရင်ခံစာတွင် ကြေညာကာ ပြီးဆုံးခဲ့ရသည်။ ဗြိတိသျှအစိုးရက စုံစမ်းရေးကော်မတီဖွဲ့ပြီး ကုလား-ဗမာ အဓိကရုဏ်းနှင့် ပတ်သတ်ပြီး အစီရင်ခံစာ တင်သွင်းခိုင်းရာ ထိုအစီရင်ခံစာ၌ ဒို့ဗမာအစည်းအရုံးသည် နိုင်ငံရေးမတည်မငြိမ်ဖြစ်အောင် ဖန်တီးသည်ဟူ၍လည်းကောင်း၊ နိုင်ငံခြား ကွန်မြူနစ်များဖြစ်သည့် အိန္ဒိယနှင့် အင်္ဂလန်ကွန်မြူနစ်များ၏ သွေးထိုးလှုံ့ဆော်မှုကြောင့် ထိုအဓိကရုဏ်း ဖြစ်ရသည်ဟု ဖော်ပြခဲ့ပါသည်။ စင်စစ်အားဖြင့် ဗြိတိသျှအစိုးရက ထွက်ပေါက်ရှာလိုက်ခြင်းဖြစ်၏။ ၁၉၆၇ ခုနှစ် စစ်တပ်က အာဏာသိမ်းပြီး ဆန်ပြဿ   နာ အကြီးအကျယ်တက်ကာ ဆန်ရှားပါးမှု ဖြစ်ခဲ့ရသည်။ တချို့နေရာများတွင် ဆန်လုယူမှုအထိ ရှိခဲ့သည်။ ထိုအခြေအနေမျိုးတွင် စစ်အစိုးရသည် ကောလာဟလ မျိုးစုံဖြင့် တရုတ်-ဗမာ အရေးခင်းကြီးကို ဖန်တီးခဲ့သည်ဟု အတိုက်အခံများနှင့် နိုင်ငံခြားသတင်းဌာနများက စွပ်စွဲခဲ့ဖူးလေသည်။ မည်သို့ပင်ဖြစ်စေ၊ အကျပ်အတည်းတခုဖြစ်လာတိုင်း လူမျိုးရေး၊ ဘာသာရေး အဓိကရုဏ်းများ ဖန်တီးတတ်သော အုပ်စိုးသူများ၏ အစဉ်အလာကို ပြည်သူများက သဘောပေါက်နေကြပြီဖြစ်သည်။ အာဏာကို လက်မလွှတ်လိုသူများက ထိုသို့ ပြဿ  နာများ ဖန်တီးခဲ့ကြသည်မှာ အဆန်းမဟုတ်တော့ပေ။ ထိုကဲ့သို့ ကြီးကျယ်သော ပြဿ နာများဖြစ်လာတိုင်း မိမိတို့၏အပြစ်ကို ဖုံးကွယ်လိုသူများ သို့မဟုတ် တရားခံရလျှင်ပြီးရော ဟူ၍ တရားခံရှာလိုသူများက ကိုလိုနီခေတ် ပုလိပ်များလုပ်လေ့ရှိသလို တရားခံရအောင် ရှာတတ်လေသည်။ အပြစ်ရှိသည်ဖြစ်စေ၊ မရှိသည်ဖြစ်စေ တရားခံရှာနိုင်လျှင် အမှုပြီးပြီဟု ယူဆကြသည်။ စစ်အစိုးရခေတ်၌လည်း ထိုကဲ့သို့ တရားခံရှာတတ်လေသည်။ ဥပမာ- တညင်ဘီအိုစီ ဗုံးပေါက်ကွဲမှုနှင့် ပတ်သက်၍ ဖောက်ခွဲရေးသမားဟု တွေ့သောသူကို ဖမ်းဆီး၍ တသက်တကျွန်းပြစ်ဒဏ် ချမှတ်ခဲ့သည်။ နောင် ဖောက်ခွဲသူကိုယ်တိုင် ၀န်ခံသောအချိန်တွင်လည်း ယခင်အဖမ်းခံရသောသူမှာ ထောင်ထဲ၌ ဆက်နေနေရလေသည်။ ပြစ်ဒဏ်မှ မလွတ်ခဲ့ပေ။ လွန်ခဲ့သောလက မြန်မာသံတော်ဆင့် ဂျာနယ်မှ အယ်ဒီတာနှင့် ပြည်ခိုင်ဖြိုးပါတီ၏ ခေါင်းဆောင်တဦးဖြစ်သော ယခင်ဝန်ကြီးဟောင်း ဦးအောင်သောင်းတို့ တွေ့ဆုံမေးမြန်းခန်းတွင် လက်ပံတောင်းတောင် အရေးအခင်းမှနေ မိတ္ထီလာအရေးအခင်းအထိ ဖန်တီးသူမှာ ဗကပ ယူဂျီဟောင်းများ ဖြစ်သည်ဟု စွပ်စွဲလိုက်သည်ကို ဖတ်ရသည်။ ဗွီအိုအေနှင့် တွေ့ဆုံမေးမြန်းခန်းတွင်လည်း ထိုကဲ့သို့ပင် ပြောဆိုခဲ့သည်ကို နားထောင်လိုက်ရပါသည်။ (၂) “ခုခါလူထုက နာပြီမို့ တပါတီစနစ် ဖြုတ်ချ ဒီမိုကရေစီ အများဆန္ဒနဲ့ အစိုးရဖွဲ့ရေး လူထုကဟစ်ကြွေးတော့ ဆူပူရေးသမား ဗကပများတဲ့ လုပ်စားနေတဲ့လူကြီးများက ရှေးနည်းအတိုင်း တံဆိပ်တပ်ပြီး လူထုလုပ်ရပ် သေးသိမ်အောင် ကလိန်စေ့ငြမ်းစင်လေပြီ။ ပြည်ထောင်စုပြိုကွဲပြီး ဖရိုဖရဲ မဖြစ်အောင်တဲ့ မျိုးချစ်စိတ်ဓာတ် တစ်ခွဲသားနဲ့ စကားကိုတရားလုပ် လွှင့်ထုတ်နေကြ ဓာတ်ပြားဟောင်းအတိုင်း အပ်သွားကြောင်းထပ်ပြီး အဓမ္မပါးစပ်နဲ့ ကျားကျားမီးယပ် လုပ်ကြပြန်ပြီ ကျောင်းသားနဲ့ပြည်သူ ဆူပူအောင်လုပ်တာ ဗကပလို့တစ်မျိုး အမျိုးသားဒီမိုကရေစီ အဖွဲ့အတွင်း ကွန်မြူနစ်တွေ စီးနင်းလေဟန် သတင်းတွေချဲ့ကား အတင်းလိမ်လည်လှည့်စားလို့တစ်မျိုး မဟားတရားကြံစည်ပြီး ဒီမိုကရေစီကို ဟန့်တားနေပြန်ပြီ ခုတော့ သမိုင်းကသိ လူကမိပြီ လူကြီးမင်းတို့လက်ရာ ညာလို့မရတော့ဘူး နိုးကြားတဲ့ ပြည်သူတွေမို့ အထူအပိန်းမထင်ကြနဲ့တော့ ပါးစပ်ဟလိုက်တိုင်း အူမကို အတိုင်းသားပါပဲ လူကြီးမင်းတို့ ဖော်နည်းကားတွေ ခေတ်မစားတော့ဘူး ခေတ်နောက်ကျသွားပါပြီ” (“ကွန်မြူနစ်ဆန့်ကျင်ရေး လူကြီးမင်းများ” - တင်မိုး) (၃) တရားခံဖော်မရသော အကြမ်းဖက် တိုက်ခိုက်မှုများမှာ စစ်အစိုးရ လက်ထက်က တခုပြီးတခု ဖြစ်ပေါ်ခဲ့ပါသည်။ ဥပမာ - စစ်အစိုးရလက်ထက်က အတွင်းရေးမှူး - ၂ ဒုတိယဗိုလ်ချုပ်ကြီးတင်ဦးနှင့် အပေါင်းအပါ ဗိုလ်ချုပ်ကြီးများ စီးနင်းလိုက်ပါသွားသော ရဟတ်ယာဉ် ပေါက်ကွဲပျက်စီးသွားသောအမှုမှာ ယခုတိုင် တရားခံ မဖော်ထုတ်နိုင်သေးပေ။ ကမ္ဘာအေးတွင် ထားရှိသော စွယ်တော်ဗုံးကွဲမှု တရားခံကို မဖော်ထုတ်နိုင်သလို ဒုတိယဗိုလ်ချုပ်ကြီးတင်ဦး၏ အိမ်၌ ပါဆယ်ထုပ် ပေါက်ကွဲကာ ဒုတိယဗိုလ်ချုပ်ကြီးတင်ဦး၏ သမီး သေဆုံးခဲ့ရသည်မှာလည်း တရားခံ တိတိကျကျ တင်မပြနိုင်ခဲ့။ အဆိုးဆုံးမှာ ရန်ကုန်မြို့ ကုန်သွယ်ရေး အဆောက်အဦ ဗုံးကွဲမှု၊ ဒဂုန်စင်တာ ဗုံးကွဲမှု၊ ဂျန်းရှင်းအိပ် ဗုံးကွဲမှုများ ဆက်တိုက်ဖြစ်ပေါ်ပြီး လူများစွာ သေဆုံးကာ တရားခံမရှာနိုင်ခဲ့ပေ။ ထိုအချိန်က ဗကပမှာလည်း တောထဲတွင် ပြိုပျက်နေသလို မြေပေါ်တွင်လည်း ယူဂျီအားလုံးလိုလို ထောင်ထဲရောက်နေခဲ့သည်။ ထို့ကြောင့် တရားခံ ဗကပဟု လက်ညှိုးထိုး စွပ်စွဲ၍ မရတော့ပေ။ ထို့အတူ ထိုထက်ဆိုးသောအမှုမှာ စစ်အစိုးရခေတ်က တက္ကသိုလ်ရိပ်သာလမ်းရှိ ကျောက်မျက်ရတနာကုန်သည်၏ အိမ်တွင် ဝင်ရောက်သတ်ဖြတ်သွားသော ငါးလောင်းပြိုင် လူသတ်မှုကြီး ဖြစ်ပါသည်။ နေ့ခင်းကြောင်တောင် ထိုလူသတ်မှုကြီးကို ကောလာဟလ သတင်းမျိုးစုံ ထွက်နေခဲ့၏။ မည်သူ့သားသမီး ပါဝင်ပတ်သက်သည်၊ စီအိုင်ဒီကို ထိုအမှုအား မလိုက်ခိုင်း၍ စီအိုင်ဒီက ထိုအမှုကို လက်လွှတ်ထားခဲ့သည်ဆိုသော ကောလာဟလများ လူထုကြားထဲ နားမဆန့်အောင် ကြားခဲ့ရသည်။ ယခုထက်တိုင် တရားခံကို ရှာမတွေ့၊ ဖမ်းဆီးမရနိုင်ပေ။ နိုင်ငံရေးအမှုမဟုတ်၍ ဗကပကိုလည်း လက်ညှိုးထိုး၍ မရနိုင်။ ထုိ့ထက်ဆိုးသည်မှာ ဒေါ်အောင်ဆန်းစုကြည်နှင့် ဦးတင်ဦးတို့ ပါဝင်သော အဖွဲ့ကို ဒီပဲယင်း၌ ရိုက်နှက် အကြမ်းဖက်သော လူသတ်မှုကြီး ဖြစ်သည်။ ထိုအမှုကို ယခုအထိ တရားခံရှာမရ။ မည်သူ ဦးစီးသည်။ မည်သူခေါင်းဆောင်သည်ဟူသော ကောလာဟလများမှာ ထုံးစံအတိုင်း ထွက်ခဲ့ပါသည်။ ထိုအမှုကိုလည်း ဗကပယူဂျီများဟု တရားခံရှာ စွပ်စွဲလျှင် ယုတ္တိမတန်လွန်းသောကြောင့် တရားခံကို မဖန်တီးခဲ့ပေ။ ထိုကဲ့သို့သော အမှုအခင်းပေါင်း မြောက်များစွာသည် ယခုထက်တိုင် ကျန်ရှိနေဆဲ ဖြစ်သည်။ ထိုသို့ အမှုအခင်းများကို တက်လာသော အရပ်သားအစိုးရမှာ ဒီမိုကရေစီ အစိုးရပီပီ ရှာဖွေဖော်ထုတ်သင့်ပါသည်။ လက်ပံတောင်းတောင် လယ်သမားများ၏ မိမိတို့ မတရားသိမ်းခံရသော မြေများ ပြန်ရရေး တိုက်ပွဲမှာ လူထုတိုက်ပွဲတခုဖြစ်၏။ အကြမ်းဖက်မှုတခု မဟုတ်ပေ။ ဗကပယူဂျီများက နောက်ကွယ်က သွေးထိုးနေသည်ဟူသည်မှာ ယုတ္တိမဲ့လွန်း၏။ ဒေသခံလယ်သမားများက မကျေနပ်၍ တိုက်ပွဲဝင်နေဆဲ ဖြစ်သည်။ တရားနည်းလမ်းကျသော တောင်းဆိုတိုက်ပွဲဝင်မှုလည်း ဖြစ်သည်။ ရှုံးသည်၊ နိုင်သည်၊ တောင်းဆိုချက် ရသည်၊ မရသည်မှာ ဆုံးဖြတ်၍ မရသေးဘဲ နောက်ကွယ်က သွေးထိုးပေးနေသည်ဆိုသော စွပ်စွဲချက်မှာ နိုင်ငံရေးပါးမဝသော စွပ်စွဲချက် ဖြစ်လေသည်။ မိတ္ထီလာ အရေးအခင်းမျိုးကိုကား ဗကပယူဂျီများက နောက်ကွယ်က စည်းရုံးလှုံ့ဆော်၍ ဖြစ်ပေါ်သည်ဟု ယူဆပါလျှင် စွပ်စွဲသော ပုဂ္ဂိုလ်ကလည်း သက်သေ အထောက်အထား ခိုင်ခိုင်လုံလုံဖြင့် တိုင်းပြည်အတွက် မှန်မှန်ကန်ကန်၊ ခြေခြေမြစ်မြစ် စွပ်စွဲနိုင်လျှင် တရားရုံးတွင် တရားစွဲနိုင်ပါသည်။ ထိုကဲ့သို့ မခိုင်လုံဘဲ တရားခံဖြစ်လျှင်ပြီးရောဟု တရားခံရှာမည်ဆိုလျှင် ထိုစကားအတွက် မိမိဘာသာ တာဝန်ယူရပေလိမ့်မည်။ (၄) “တရားသူကြီးမင်းများခင်ဗျား။ ဒီလို ကွန်မြူနစ်တွေကို ကလိန်ကျစော်ကား စွပ်စွဲမှုဟာ ဒါ ပထမအကြိမ် မဟုတ်ပါဘူး။ ကျနော်ဟာ အဖြစ်အပျက်အားလုံးကို မရေတွက်ပြနိုင်ပေမယ့် ဂျာမနီပြည်မှာ တခါတုန်းက စိတ်မနှံ့သူ စွန့်စားရေးသမားနဲ့ ကြေးစားသူလျှိုတွေဟာ မီးရထားလမ်း ဖျက်ဆီးမှု မှုခင်းတခု ပြုလုပ်ခဲ့တယ်ဆိုတာ ကျနော်ပြန်ပြီး သတိပေးနိုင်ပါတယ်။ ရက်ပေါင်းများစွာ အပြည်ပြည်က သတင်းစာတွေနဲ့ ဂျာမနီပြည်က သတင်းစာတွေက ဒီဖျက်ဆီးမှုဟာ ဂျာမနီကွန်မြူနစ်ပါတီက လုပ်တယ်လို့ စွပ်စွဲခဲ့ကြတယ်။ ဒါဟာ ကွန်မြူနစ်တွေ လုပ်ရပ်ဖြစ်တယ်လို့ စွပ်စွဲရေးသားခဲ့ကြတယ်။ နောက်တော့မှ ဒီရာဇဝတ်မှုတွေရဲ့ အရင်းအမြစ်က စိတ်မနှံ့သူ စွန့်စားရေးသမား မတူကာ ဖြစ်နေတယ်လို့ ရုပ်လုံးပေါ်လာပါတယ်။ တခြားအဖြစ်အပျက်တရပ်ကို ပြန်ပြောပါရစေဦး။ ဒါက ပြင်သစ်သမ္မတကို ဂေါ်ဂူလော့ဗ် (Gorgulov) က လုပ်ကြံသတ်ဖြတ်မှု ဖြစ်တယ်။ ဒါကိုလည်း အပြည်ပြည်က သတင်းစာတွေက ရက်ပေါင်းများစွာ ကွန်မြူနစ်တွေ လုပ်တာလို့ ရေးပါတယ်။ ဂေါ်ဂူလော့ဗ်ကိုလည်း ဆိုဗီယက်နိုင်ငံရဲ့ သူလျှို ကွန်မြူနစ်တယောက် အဖြစ် သမုတ်ကြတယ်။ ကဲ.. တကယ့်အမှန်တရားက ဘာလဲ။ တကယ်လုပ်ကြံသူက ရုရှားတပ်ဖြူတွေဖြစ်တယ်။ ဆိုဗီယက်နဲ့ ပြင်သစ်ကြား ဆက်ဆံရေးကို ဖျက်ဆီးဖို့ ကြံစည်သူတွေက ဂေါ်ဂူလော့ဗ်ကို သူတို့ လက်ကိုင်တုတ်အဖြစ် သုံးခဲ့တယ်။ ဆိုဗီယာ ခရစ်ယာန်ကျောင်းမှာ ဖြစ်ခဲ့တဲ့ မှုခင်းကိုလည်း ပြောပါရစေဦး။ ဒီအမှုမှာလည်း ဘူဂေးရီးယား ကွန်မြူနစ်ပါတီက ဘာမှမဆိုင်ဘဲ စွပ်စွဲခံခဲ့ရတယ်။ ဒီကလိန်ကျမှုကြောင့် ဘူဂေးရီးယားက အလုပ်သမားတွေ၊ လယ်သမားတွေ၊ ပညာတတ်တွေ ၂ဝဝဝ လောက် အသတ်ခံရတယ်။ အဖြစ်မှန်က ဘူဂေးရီးယားပုလိပ်တွေက လုပ်ကြံတဲ့ ရန်စမှုဖြစ်တယ်။” ဟု ၁၉၃၃ ခုနှစ်က ဂျာမနီနိုင်ငံ၌ ဟစ်တလာအုပ်စိုးစဉ်က ရိုင်းစတက်လွှတ်တော် မီးရှို့မှုဖြင့် ဘူဂေးရီးယား ကွန်မြူနစ်ပါတီမှာ ဂျော်ဂျီဒီမီထရော့ဗ်ဂိုအားရင်းကို ဂတ်စတာဗို ပုလိပ်အဖွဲ့က ဖမ်းဆီးပြီး တရားခံလုပ်ရာ၌ ဒီမီထရော့ဗ်က အထက်ပါအတိုင်း တရားရုံး၌ လျှောက်လဲခဲ့ခြင်း ဖြစ်ပါသည်။ (၅) မြန်မာ့နိုင်ငံရေးသမိုင်း အထူးသဖြင့် စစ်အာဏာရှင်များ လွှမ်းမိုးသော နှစ် ၅ဝ သမိုင်း တလျှောက်တွင် လူထုတိုက်ပွဲများ၊ လူထုအုံကြွမှုများ ပေါ်ပေါက်လာတိုင်း စစ်အာဏာရှင်များသည် တရားခံ ရှာလေ့ရှိသည်။ မည်သူက ဦးဆောင်ကာ မည်သူက နောက်ကွယ်က သွေးထိုးလှုံ့ဆော်ပေးသလဲဆိုသည်ကို အပြစ်ရှာပြီး နောက်ဆုံး သူတို့သတ်မှတ်သော၊ အထူးသဖြင့် သူတို့ သမိုင်းနှင့်ချီပြီး ထိတ်လန့်တုန်လှုပ်သော ဗမာပြည်ကွန်မြူနစ်ပါတီ (ဗကပ) ကို အပြစ်ပုံချတတ်ပါသည်။ ထိုကဲ့သို့ ကွန်မြူနစ်များကို တရားခံအဖြစ်၊ အရေးတော်ပုံ လှုံ့ဆော်သူများဟု အပြစ်ရှာတတ်သည်မှာ ဂျာမနီမှ ဟစ်တလာလည်း လုပ်တတ်သလို အီတလီမှ မူဆိုလီနီလည်း လုပ်တတ်လေသည်။ စစ်အာဏာကြီးစိုးသော နိုင်ငံများတွင်လည်း ထိုသို့ လုပ်တတ်သည်မှာ မထူးဆန်းတော့ပေ။ ဇူလိုင် ၇ ရက် အရေးတော်ပုံတွင် ကျောင်းသားများကို ရက်စက်စွာ ပစ်သတ်စဉ်က ကျောင်းသားများ နောက်ကွယ်တွင် ဗကပရှိနေသည်ဟု ဗိုလ်နေဝင်းက စွပ်စွဲ၏။ ၈၈ အရေးတော်ပုံကိုလည်း ဗကပယူဂျီများသာ ဦးဆောင်သည်ဟု စွပ်စွဲပြန်သည်။ မကြာသေးခင်က အမျိုးသားပညာရေးဥပဒေ ပြင်ဆင်ရေးအတွက် တိုက်ပွဲဝင်သော ဒီမိုကရေစီပညာရေး ဖော်ဆောင်မှု ကျောင်းသားသမဂ္ဂများနှင့် သပိတ်မှောက်စစ်ကြောင်းတို့ကို လက်ပံတန်းတွင် ရိုက်နှက် အကြမ်းဖက် ဖြိုခွဲခဲ့စဉ်ကလည်း သမ္မတ ဦးသိန်းစိန်၏ အရာရှိတဦးသည် သံအမတ်များနှင့် သံရုံးများကို ကျောင်းသားသပိတ် နောက်ကွယ်တွင် ဗကပတို့ ရှိနေသည်ဟု ဆိုသည်။ ထိုသို့ ရှင်းလင်းရာတွင် အချက် ၃ ချက်ဖြင့် ရှင်းလင်း၏။ နံပါတ်တစ် ကျောင်းသားသပိတ် စတင်သည့်နေ့မှာ ဗကပခေါင်းဆောင် ဗိုလ်ကျင်မောင် ကွယ်လွန်သည့်နေ့ ဖြစ်သည်။ နံပါတ်နှစ် ကျောင်းသားခေါင်းဆောင်များသည် အလေးပြုရာတွင် အလေးနီပြုကြခြင်း၊ နံပါတ်သုံး ကွန်မြူနစ်တို့၏သီချင်း International ခေါ် နိုင်ငံတကာသီချင်းကို သီဆိုကြခြင်းတို့ကြောင့် ဗကသများမှာ ဗကပများ ဖြစ်သည်ဟု စွပ်စွဲပြောဆိုကြလေသည်။ ရာစုနှစ်တ၀က် ကျော်လာသည်အထိ အုပ်ချုပ်ခဲ့သော စစ်အစိုးရ အဆက်ဆက်ကို ဗကပ တစ္ဆေ္ဆကြီး ခြောက်ခဲ့သည်မှာ လွန်ခဲ့သော နှစ်ပေါင်း ၁၆ဝ ကျော်က ဥရောပတွင် ကွန်မြူနစ် တစ္ဆေ္ဆကြီး ခြောက်ခဲ့သလိုဖြစ်သည်။ စင်စစ် ဗကပတစ္ဆေသည် စစ်အုပ်စုအတွက် သူတို့အာဏာ မစွန့်လွှတ်နိုင်အောင် အကြောင်းပြသော ဆင်ခြေကြီးတခု ဖြစ်နေပေတော့သည်။ ထက်မြက်