အစိုးရတပ်နှင့် ကေအိုင်အေ တိုက်ပွဲပြင်းထန်
DVB
·
June 15, 2011
မြန်မာအစိုးရစစ်တပ်က ကချင်လွတ်လပ်ရေးတပ်မတော် တပ်မဟာ (၃) တပ်ရင်း (၁၅) ကို တပ်ရင်းဆယ်ရင်းနဲ့ ဆက်လက်တိုက်ခိုက်နေပြီး ဇွန် ၁၂ ရက်နေ့အထိ တိုက်ပွဲမှာ ကေအိုင်အေဘက်က သုံးဦးကျဆုံးသွားပြီး အစိုးရဘက်ကတော့ တရာလောက် ဒဏ်ရာရတယ်လို့ သတင်းရရှိကြောင်း၊ အကျအဆုံးလည်း များနိုင်ကြောင်း ကေအိုင်အို ပြောခွင့်ရ ပုဂ္ဂိုလ် ဗဟိုကော်မတီဝင် ဦးလနန်းက ပြောကြားပါတယ်။
လက်ရှိတိုက်ပွဲအခြေ အနေအရ မြန်မာ့တပ်မတော်နဲ့ ကေအိုင်အို - ကချင် လွတ်လပ်ရေးအဖွဲ့အကြား ကေအိုင် အိုအကြား တိုက်ပွဲအတိအလင်းဖြစ်နေပြီလို့ ကေအိုင်အိုက ပြောကြားပါတယ်။
ကေအိုင်အိုဌာနချုပ်ရှိတဲ့ လိုင်ဇာဘက်ကိုလည်း အစိုးရစစ်တပ်ဘက်က အင်အားအလုံးအရင်းနဲ့ တိုးချဲ့နေတယ်လို့လည်း ကေအိုင်အိုက ပြောပါတယ်။
ကချင်ပြည်နယ် အနှံ့မှာလည်း တိုက်ပွဲတွေ ဆက်ဖြစ်တော့မယ်လို့ ဦးလနန်းက ပြောကြားပါတယ်။
ဒီလ (၉) ရက် ကြာသပတေးနေ့မှာ မြန်မာ့တပ်မတော် တပ်ရင်းနှစ်ရင်းက ကေအိုင် အေ တပ်မဟာ (၃) တပ်ရင်း (၁၅) ကို ပစ်ခတ်တိုက်ခိုက်ခဲ့ပြီး နှစ်ဘက် စစ်သုံ့ပန်းတွေ အပြန်အလှန် လဲလှယ်ပြီး တိုက်ပွဲရပ်ခဲ့ပါတယ်။
ကေအိုင်အေက ဖမ်းဆီးရမိတဲ့ ဗိုလ်ကြီး တဦးနဲ့ ဗိုလ်တဦးကို ပြန်လွှတ်ပေးပါတယ်။ မြန်မာစစ်တပ်က ဖမ်းဆီးခဲ့တဲ့ ကေအိုင်အို ဆက်ဆံရေးရုံးက ဒု-တပ်ကြပ် ချန်းယိမ်းကိုတော့ အလောင်းပဲ ပြန်အပ်လိုက်တာပါ။
အဲဒီ နောက် စနေနေ့ကစပြီး ဗန်းမော်ခရိုင် မိုးမောက်မြို့နယ်ရှိ ကေအိုင်အေ အမှတ် ၁၅ တပ်ရင်းကို ၈၂ မီ လီမီတာ အမြောက်တွေ အပါအဝင် လက်နက်ကြီးငယ်တွေနဲ့ တိုက်ခိုက်နေတာပါ။
ကေအိုင်အိုရဲ့ နောက်ဆုံးလက်ကျန် မြစ်ကြီးနားမြို့က ဆက်ဆံရေးရုံးကို တနင်္ဂနွေ နေ့မှာ လုံးဝပိတ်လိုက်ပြီး အစိုးရစစ်တပ်နဲ့ ကေအိုင်အိုအကြား ဆက်ဆံရေး ပြတ်တောက်သွားပါပြီ။
ဒါပေမယ့် လွန်ခဲ့တဲ့ နှစ်ရက်အတွင်း ကြားလူပုဂ္ဂိုလ်တဦးက တဆင့် နေပြည် တော်ဘက်က ဆက်သွယ်လာပြီး အထက်တာဝန်ရှိသူတဦးဦးနဲ့ ဆွေးနွေးဖို့ ညှိနှိုင်းခဲ့ပေမယ့် ဒီနေ့မနက်အထိ အကြောင်းမပြန်လာသေးတဲ့အပြင် အစိုးရတပ်ဘက်က အရှိန်မြှင့် တိုက်ခိုက်နေတာကြောင့် ဒီနေ့မှာ ကေအိုင်အို အရေးပေါ် အစည်းအဝေး ကျင်းပပြီး အစိုးရ ဘက်က အကြောင်းမပြန်ရင် ကေအိုင်အေဘက်က ကချင်ပြည်နယ်အနှံ့ တိုက်ပွဲဝင်ဖို့ ဆုံးဖြတ်ထားပြီလို့ ဒီမနက် ၁ဝ နာရီမှာ အစိုးရဘက်ကို အသိပေးအကြောင်းကြားလိုက်ပြီ လို့ ကေအိုင်အိုပြောခွင့်ရပုဂ္ဂိုလ် ဦးလနန်းက ပြောကြားပါတယ်။
နောက်ဆုံးအခြေအနေကို သိရဖို့ ဦးလနန်းကို ဆက်သွယ်မေးမြန်းထားပါတယ်။
ကေအိုင်အေရဲ့ အရေးပေါ်အစည်းအဝေး ဆုံးဖြတ်ချက်လေး သိပါရစေ။
“ကျနော်တို့ ဒီမနက်ပြန်ပြီးတော့ ဆုံးဖြတ်ချက်ချတာတော့ အစိုးရကို အကြောင်းကြားတာကတော့ ဒီနေ့ ညနေ ၆ နာရီအထိ အစိုးရတပ်တွေရဲ့ ပစ်ခတ်မှုကို အရှိန်မလျော့ဘူးဆိုရင်၊ ဒါမှမဟုတ်လည်း ထိုးစစ်ဆင်မှုအတွက် သူတို့ရဲ့ တပ်အင်အားကို တိုးချဲ့လာမယ်ဆိုရင် တပ်ကို စွဲထားတဲ့နေရာ အတိုင်းအတာ တခုအထိ ကျနော်တို့ ပြန်လည်တွန်းလှန်တဲ့ စစ်ပွဲစတင်သွားမယ်လို့ အစိုးရကို အကြောင်းကြားလိုက်တယ်။ အဲဒါ ဒီနေ့မနက် ၁ဝ နာရီလောက်က အကြောင်းကြားလိုက်တာပါ။”
အခုဒီတိုက်ပွဲ အပြင်းထန်ဆုံး ဖြစ်တဲ့နေရာမှာ တိုက်ခိုက်ပုံတွေနဲ့ တုံ့ပြန်ခုခံနေတဲ့ ပုံတွေကို နည်းနည်းရှင်းပြလို့ရမလား။
“သူတို့ဘက်ကတော့ တပ်ရင်းအများကြီးသုံးပြီးတော့ အဝေးကနေ လက်နက်ကြီးသုံးပြီး ပစ်တာပဲ။ ကျနော်တို့ဘက်ကတော့ လက်နက်ကြီးကို တွင်တွင်ကျယ်ကျယ်မသုံးဘူး။ သူတို့ရှိတဲ့ဘက်မှာ ရွာတွေရှိတယ်။ နောက်ပြီးတော့ ရေအားလျှပ်စစ် စီမံကိန်း လုပ်နေတာရှိတယ်။ အဲတော့ လက်နက်ကြီး သုံးတဲ့အခါမှာ အဲဒီဘက်ကို မှားပြီးတော့ ဝင်သွားမှာကို စိုးရိမ်လို့ လက်နက်ငယ်ကို အဓိကထား သုံးတယ်။ အခြား တပ်ရင်းတပ်ဖွဲ့တွေကို အဲဒီမှာ တပ်ကူဆိုပြီးတော့ အင်အားဖြည့်တင်းတာတွေ မလုပ်ဘူး။ ကျနော်တို့ဘက်က မနေ့ကထိတော့ သုံးယောက်ကျတယ်။ သူတို့ဘက်မှာတော့ ထိခိုက်ဒဏ်ရာရတာ တော်တော်များတယ်။ ကျဆုံးတာလည်းပါလိမ့်မယ်။ ထိခိုက်ဒဏ်ရာရတာ အနည်းဆုံး ၁ဝဝ နီးပါးလောက် ရောက်လိမ့်မယ်။ ဗန်းမော်ဘက်က၊ မိုးမောက်ဘက်က၊ တက်လာတဲ့သတင်းအရ အယောက် ၁ဝဝ နီးပါး ရှိပါလိမ့်မယ်။
ဒီတိ်ုက်ပွဲကြောင့် ဒေသခံ ပြည်သူတွေက တရုတ်- မြန်မာနယ်စပ်ဘက်ကို ထွက်ပြေးတိမ်းရှောင်နေကြတယ်လို့ သိရပါတယ်။ အဲဒီစစ်ပြေးဒုက္ခသည်တွေ အခြေအနေနဲ့ ပတ်သက်လို့ ဘယ်လိုများသိရပါလဲ။
“မနေ့ကထိတော့ အခုတိုက်ပွဲဖြစ်တဲ့ဧရိယာမှာရှိတဲ့ ရွာသားတွေကတော့ တရုတ်ဘက်ကို ဝင်ပြီးတိမ်းရှောင်နေတဲ့ သတင်းတွေတော့ ရတယ်။”
ထောင်ချီပြီး သွားနေကြတယ်ဆိုတော့ တကယ်ပဲ အဲလောက်များလားခင်ဗျ။
“ဖြစ်နိုင်ပါတယ်။ နောက်ကို အဲဒီထက်တောင် ကျော်သွားပါလိမ့်မယ်။ အခုဖြစ်တာ တပ်မဟာ ၃ ဧရိယာ တပ်ရင်း ၁၅ လောက်ကဟာပဲ ဖြစ်တော့ အဲလောက်ပဲဖြစ်ပါလိမ့်မယ်။ ကျနော်တို့ ကြားတဲ့သတင်းအရဆိုရင် သူတို့ ဗဟိုဌာနချုပ်က လိုင်ဇာကို သူတို့ဝိုင်းရံပြီးတော့ ဖြိုခွဲမယ့် ပုံစံလုပ်လာတဲ့အခါမှာ တိုက်ပွဲက ပြင်းထန်လာလိမ့်မယ်။ ဘယ်အချိန်မှာ စပြီးတော့ ပြင်းထန်မယ်ဆိုတာ မပြောနိုင်သေးဘူး။ အဲဒီအချိန်ကျရင်တော့ စစ်ပြေးဒုက္ခသည်တွေက တရုတ်နိုင်ငံက ဒီထက်အများကြီးဝင်လာလိမ့်မယ်။”
တကယ်လို့ သူတို့ဘက်ကနေ တိုးမြှင့်တိုက်ခိုက်လာမယ်ဆိုရင် ဗိုလ်မှူးတို့ဘက်ကကော။
“အဲဒီမှာဖြစ်တဲ့တိုက်ပွဲကို တပ်ရင်း၁၅မှာ ဖြစ်တဲ့ပုံစံတိုက်ပွဲကို တခြားဒေသကို မပြန့်ပွားစေချင်ဘူး။ အဲဒီမှာပဲ ခံပြီးတော့ တိုက်မယ်။ ဒါပေမယ့် အခုသူတို့စီကို တောင်းထားတဲ့အချိန်က လွန်သွားပါပြီ။ အဲဒါကြောင့် ဖြစ်လာမယ်ဆိုရင် အဲဒီ တပ်ရင်း ၁၅ မှာပဲ အင်အားတွေဖြည့်ပြီးတော့ စုပြုံပြီးတော့ ကျနော်တို့ ပြန်လည်တိုက်ခိုက်မှာ မဟုတ်ပါဘူး။ သဘောက ကချင်ပြည်နယ်ဒေသတခုလုံး ရှမ်းပြည်နယ်မြောက်ပိ်ုင်းမှာကော အားလုံးက တပ်ဖွဲ့တွေက ဖြန့်ချထားတော့ နေရာတကာမှာ စစ်ဆင်ရေးတွေ လုပ်လာနိ်ုင်တဲ့ အခြေအနေတော့ ရှိတယ်။ အဲတော့ နောက်ဆုံး လက်လွတ်မခံရအောင်ဆိုပြီးတော့ ရှိတဲ့အင်အားတွေ စုပြုံပြီးတော့ လုပ်မှာတော့ မဟုတ်ဘူး။”
သူတို့ဘက်ကလည်း မတုံ့ပြန်သေးဘူးဆိုတော့ အစိုးရသစ်တပ်နဲ့ ကေအိုင်အေ ကချင်လွတ်လပ်ရေး တပ်မတော်နဲ့ အတိအလင်း တိ်ုက်ပွဲဖြစ်ပြီလို့ အတိအကျတော့ ပြောလို့ရပြီပေါ့နော်။
“ဒီအခြေအနေအရဆိုရင်တော့ ပြောလို့ရပြီ။ ဒါပေမယ့် အခုတပ်ရင်း ၁၅ မှာထဲကိုက သေနတ်သံထွက်သေးတယ်။ တခြားဒေသမှာတော့ အခုထက်ထိတော့ သေနတ်ဖောက်တာ မရှိသေးဘူး။ မြောက်ပိုင်းတိုင်း စစ်ဌာနချုပ်နဲ့တော့ အဆက်အသွယ် ပြတ်သွားပြီ။ သူတို့ကလည်း ဆက်သွယ်လာတာမျိုး မရှိတော့ဘူး။”
ဆက်ဆံရေးရုံးကတော့ မနေ့ကထဲက ပိတ်လိုက်ပြီပေါ့နော်။
“ဖန်ခါမှာရှိတဲ့ ကေအိုင်အေဆက်ဆံရေးရုံး၊ ဒါကတော့ အရင်တခေါက်က ဖြုတ်တဲ့ထဲမှာ အဲဒီရုံးတော့ မပါဘူး။ မြို့ထဲမှာ မဟုတ်ဘူး။ ကျနော်တို့ရဲ့ အုပ်ချုပ်ခွင့် စပ်ကူးမတ်ကူး ဟိုဘက်သူတို့ဘက်လည်းရှိတယ်။ ကျနော်တို့ဘက်လည်းရှိတယ်။ အဲဒီရွာစပ်က ဆက်ဆံရေးရုံးမှာ၊ အခုတော့ သူတို့အဲဒီမှာ ဒုတပ်ကြပ်ချန်းယိမ်းကို ဖမ်းဆီးလာတာ အဲဒီဆက်ဆံရေးရုံးအတွင်းမှာကို ဖမ်းဆီးတယ်။ အဲဒီရုံးအတွင်းမှာကို ရက်စက်ပြီးတော့ သတ်ဖြတ်လိုက်တယ်။ အလောင်းကိုလည်း အဲဒီရုံးထဲမှာပဲ အလောင်းကို ဒီတိုင်းပစ်ပုံထားတာရှိတယ်။ အမှန်ဆို ဆက်ဆံရေးတာဝန်ရှိ ပုဂ္ဂိုလ်ဆိုတာက နိုင်ငံတကာအနေနဲ့ပြောရင် သံတမန်ပုဂ္ဂိုလ်တွေပဲ။ သံတမန်ပုဂ္ဂိုလ်တယောက်ကို ဒီလိုမျိုး ဥပဒေမဲ့ ပြုမူဆက်ဆံတယ်ဆိုရင် ဒါကို အများကြီးစဉ်းစားရဖို့ အချက်တွေ ပေါ်လာတယ်။ ဒါကြောင့်မို့ ချင်းကြားတွင်းမှာရှိတဲ့ ဗဟိုကိုယ်စားလှယ်ရုံးက တာဝန်ကျတဲ့ ဆက်ဆံရေး ဝန်ထမ်းအရာရှိတွေအားလုံးကို ကျနော်တို့က သူတို့ရဲ့ အသက်အိုးအိမ်စည်းစိမ်ကို လုံခြုံဖို့အတွက် သူတို့ဒီအစိုးရရဲ့ အောက်မှာဘယ်လိုနည်းနဲ့မှ စိတ်ချလုံခြုံမှုမရှိတဲ့အတွက်ကြောင့် အဲဒါကို ပြန်ခေါ်ယူခြင်းဖြစ်တယ်။”
ဦးလနန်းတို့ အနေနဲ့ တိ်ုက်ပွဲဝင်နေတဲ့ ကချင်ရဲဘော်တွေကို ဖြစ်စေ၊ မြန်မာအစိုးရကိုဖြစ်စေ ဘာများသတင်းစကား ပါးချင်ပါသလဲ။
“ကျနော်တို့ ကချင်ရဲဘော်တွေက စစ်မှန်တဲ့ပြည်ထောင်စုအတွက် ရှေ့တန်းမှာ ရဲရဲရင့်ရင့် တိုက်ပွဲဝင်နေတဲ့ စစ်သည်လို့ ကျနော်တို့သတ်မှတ်တယ်။ ကြေးစားစစ်သည် ရဲဘော်တွေမဟုတ်ဘူး။ ကျနော်တို့ရဲဘော်တွေက သူတို့မှာရှိတဲ့ အစွမ်းအစနဲ့ သူတို့ရဲ့ အသက်ကို ဥပက္ခာပြုပြီးတော့ ရွတ်ရွတ်ချွန်ချွန်တိ်ုက်ပွဲ ဝင်နေတာရှိတယ်။ အဲဒါကြောင့် ဒီမီးပွားက ဆက်ပြန့်ပွားမယ်ဆိုရင်လည်း တပ်မဟာတွေမှာရှိတဲ့ ကျနော်တို့ တပ်ဖွဲ့တပ်သားတွေကလည်း အဲဒီမူအတိုင်း ဆက်သွားမှာပါ။ နောက်ပြီးတော့ ရှေ့တန်းမှာရောက်နေတဲ့ အစိုးရတပ်က စစ်သားတွေကို ပြောချင်တာကတော့ ခင်များတို့ရဲဘော်သည် ကောင်းကောင်းမွန်မွန် ချင့်ချင့်ချိန်ချိန် စဉ်းစားသင့်တယ်။ နောက်ပြီး ကျနော်တို့ဘက်ကတော့ အခုတိုက်ပွဲဖြစ်လာတော့မယ်ဆိုရင် ကျနော်တို့ဘက်က သုံ့ပန်းပေါ်လစီဆိုတာ ရှိတယ်။ တကယ်လို့ ကံမကောင်းစွာနဲ့ ရှေ့တန်းမှာရောက်နေတဲ့ အစိုးရတပ်က ရဲဘော်တွေသည် ကိုယ့်ရဲ့ အသက်ကို စိုးရိမ်ပူပန်မှု ရှိလာပြီဆိုရင် ကျနော်တို့ဘက်ကို ဝင်လာဖို့ ဒီသတင်းကို ပါးချင်တယ်။ ဖမ်းဆီးခံရတာဖြစ်ဖြစ်၊ လက်နက်ချပြီးတော့ ဝင်လာတာဖြစ်ဖြစ် ကျနော်တို့ဘက်ကတော့ အားလုံးကို အမြဲတမ်း လက်ခံကြိုဆိုထားတယ်။ ကောင်းကောင်းမွန်မွန် ပြုစုတယ်။ သူတို့လိုချင်တဲ့နေရာကို ပြန်ပို့ပေးတဲ့ မူတွေရှိတယ်။”
ကျန်တဲ့အလားတူ တိုက်ပွဲဝင်ရဲဘော်တွေ ညီနောင်တိုင်းရင်းသား အဖွဲ့အစည်းတွေကိုကော ဘာများပြောချင်ပါသလဲ။
“ညီနောင်တိုင်းရင်းသားတွေကိုလည်း စကားပါးချင်တာတော့ အခု အားလုံးက ကျရာတာဝန်ကို ထမ်းဆောင်နေတဲ့ ရဲဘော်တွေ တိုင်းရင်းသားညီနောင်တွေဟာ ကိုယ့်မှာရှိတဲ့အစွမ်းအစနဲ့ ဝိုင်းပြီးတော့ စည်းစည်းလုံးလုံးနဲ့ ကျနော်တို့ရဲ့ ရန်သူလို့ပြောရမှာပဲ အခုချိန်မှာတော့။ အဲဒီရန်သူကို ဝိုင်းပြီးတုန့်ပြန်ကြဖို့ အဲဒါကို ဖိတ်ခေါ်ချင်တယ်။ နိုင်ငံရေးအင်အားစုဆိုရင် သူတို့ ယူအန်အက်ဖ်စီ ဆိုတာ ဖွဲ့စည်းထားတယ်။ စစ်ပွဲသဏ္ဌာန်နဲ့ အသွင်ဆောင်လာတဲ့အခါတော့ ကျနော်တို့က ဒီနိုင်ငံရေးအဖွဲ့အစည်းကလည်း လိုအပ်ရင် ကိုယ့်ရဲ့အဖွဲ့အစည်းကို ကာကွယ်ဖို့အတွက် တိုက်ပွဲဝင်လာတဲ့အခြေအနေ ရှိလာပြီ။ အဲတော့ ညီနောင်တိုင်းရင်းသား အားလုံး၊ မဟာမိတ်အားလုံးကလည်း အခုကျတဲ့ တာဝန်မှာ ကိုယ့်စီကို ကျလာတဲ့ ရန်သူတွေကိုတော့ အောင်နိုင်တဲ့ ပန်းတိုင်ရောက်အောင် ဝိုင်းဝန်းကြိုးစားပြီး တွန်းလှန်ကြဖို့ ကျနော်အဲဒါကို ပန်ကြားချင်တယ်။ စကားပါးချင်တယ်။”
တိုင်းရင်းသားတန်းတူရေးနဲ့ ကိုယ်ပိုင်ပြဋ္ဌာန်းခွင့်အတွက် လက်နက်ကိုင်တော်လှန်နေတဲ့ ကချင်လွတ်လပ်ရေးအဖွဲ့ဟာ ၁၉၉၄ ခုနှစ်မှာ အစိုးရနဲ့ အပစ်အခတ်ရပ်စဲခဲ့ပါတယ်။ ဒီ့နောက် အမျိုးသားညီလာခံကို တက်ရောက်ပြီး ဖက်ဒရယ်ပြည်ထောင်စုပေါ်ထွန်းရေးကို တင်ပြခဲ့ပါတယ်။
၂ဝဝ၉ ခုနှစ် ဧပြီမှာ နယ်ခြားစောင့်တပ်အသွင်ကူးပြောင်းဖို့ အစိုးရက ဖိအားပေးရာမှာ နယ်ခြားစောင့်အသွင်မပြောင်းဘဲ ပြည်နယ်စောင့်တပ်အသွင်ပြောင်းပြီး အုပ်ချုပ်ရေးမှာ ပါချင်တယ်လို့ တင်ပြချက်ကို အစိုးရဘက်က ပယ်ချပါတယ်။
မြန်မာအစိုးရဘက်က ပင်လုံစာချုပ်ကို လက်ခံရင် ကေအိုင်အိုက နယ်ခြားစောင့်တပ်အသွင်မပြောင်းဘဲ တခါတည်း လက်နက်ချမယ် လို့လည်း ထပ်ဆင့်ကမ်းလှမ်းခဲ့ပါတယ်။ အစိုးရဘက်ကတော့ နောက်ဆုံးမှာ လက်နက်ချခိုင်းပြီး နှစ်ဘက်တင်းမာလာခဲ့ပြီး ခုလိုတိုက်ပွဲအရှိန်မြင့်လာတဲ့ အထိ ဖြစ်လာတာပါ။