စစ်ကိုင်းတိုင်း ဒေသကြီးထဲမှာ ဖြစ်ပွားနေတဲ့ ရေကြီးနေတဲ့ ကိစ္စတွေကို ထောက်ပံ့ဖို့ ကုလသမဂ္ဂက ကမ်းလှမ်းထားတယ်လို့ ဆိုပါတယ်။ ဇူလိုင် ၂၄ ရက် ကုလသမဂ္ဂ အထွေထွေ အတွင်းရေးမှူး ဘန်ကီမွန်းရဲ့ ပြောခွင့်ရက စစ်ကိုင်းတိုင်း ရေကြီးတာတွေအတွက် ဆောင်ရွက်နေတာတွေကို ကူညီဖို့ အသင့်ရှိတယ်လို့ ပြောဆိုခဲ့ပါတယ်။ မြို့နယ် ၁၁ ခုမှာ ရေကြီးတဲ့အတွက် လူ ၇ သောင်း အပေါ် သက်ရောက်မှုရှိသလို လူ ၉ ဦး သေဆုံးပြီး အိမ် ၁၂၀၀၀ လောက်ပျက်စီးသွားတယ်လို့ ဆိုပါတယ်။ လူ ၄ သောင်းနီးပါး ဆိုးဆိုးဝါးဝါး ထိခိုက်ခံစားခဲ့ရပြီး ရွှေ့ပြောင်းခဲ့ရတယ်လို့ စစ်ကိုင်းတိုင်းက တာဝန်ရှိသူတွေကို ကိုးကားပြီး ပြောခွင့်ရက ပြောပါတယ်။ ဒေသခံအာဏာပိုင်၊ အစိုးရ၊ စစ်တပ်၊ ကြက်ခြေနီနဲ့ ဒေသခံလူထု အခြေပြုအဖွဲ့အစည်းတွေက ရေ၊ အစားအစာနဲ့ လိုအပ်တဲ့ ပစ္စည်းတွေကို ထောက်ပံ့နေတယ်လို့ ဆိုပါတယ်။