ရွေးကောက်ပွဲ သန့်ရှင်းလွတ်လပ်မျှတအောင် ဆောင်ရွက်ပေးမည်ဟု သမ္မတ ကတိပေး
DVB
·
July 9, 2015
၂ဝ၁၅ အထွေထွေရွေးကောက်ပွဲကို သန့်ရှင်းလွတ်လပ်ပြီး တရားမျှတတဲ့ ရွေးကောက်ပွဲ အဖြစ် ကျင်းပဖို့ အကောင်းဆုံး ကြိုးပမ်းဆောင်ရွက်သွားမယ်လို့ သမ္မတ ဦးသိန်းစိန်က ကတိပေး ပြောကြားလိုက်ပါတယ်။
ပါတီစုံဒီမိုကရေစီ ရွေးကောက်ပွဲကို နိုဝင်လာလ ၈ ရက်နေ့ ကျင်းပမယ်လို့ ပြည်ထောင်စု ရွေးကောက်ပွဲ ကော်မရှင်က ရက်သတ်မှတ် ကြေညာလိုက်ပြီး နောက်တနေ့ ဇူလိုင် ၉ ရက်နေ့မှာ သမ္မတက နိုင်ငံတ၀န်းကို ရေဒီယိုကနေ ပုံမှန် လစဉ်ပြောကြားတဲ့ မိန့်ခွန်းမှာ ထည့်သွင်း ပြောကြားခဲ့တာပါ။
ဖွဲ့စည်းအုပ်ချုပ်ပုံ အခြေခံဥပဒေကိုလည်း ခေတ်ကာလနဲ့အညီ၊ နိုင်ငံရေး ဖြစ်ထွန်းမှုတွေနဲ့အညီ အချိန်အခါအလိုက် ပြင်ဆင်ရေးသားသွားမယ်လို့လည်း ဆိုပါတယ်။
ဒါ့အပြင် တနိုင်ငံလုံး ပစ်ခတ်တိုက်ခိုက်မှု ရပ်စဲရေး (အန်စီအေ) စာချုပ်ကို ရွေးကောက်ပွဲမတိုင်မီ လက်မှတ်ရေးထိုးနိုင်ဖို့ ဆက်လက် ကြိုးပမ်းသွားမယ်၊ ငြိမ်းချမ်းရေး ဖြစ်စဉ်ကို အခြေခံ ပေါ်ပေါက်လာမယ့် နိုင်ငံရေးဆွေးနွေးပွဲတွေကနေ တဆင့် ဖွဲ့စည်းပုံ ပြင်ဆင်ရေးကိစ္စ ပါဝင်လာဦးမှာ ဖြစ်တယ်လို့လည်း သမ္မတက မိန့်ခွန်းမှာ ပြောပါတယ်။
